రోజూ గుడ్డు తినండి.. ఆరోగ్యంగా వుండండి!

Posted: 10/10/2014 05:42 PM IST

మానవ శరీరానికి అవసరమయ్యే పౌష్టికాహారాల్లో గుడ్డు అత్యంతమైనది. చిన్నపిల్లల నుంచి ముసలివాళ్ల వరకు అందరికీ కావలసిన పోషకవిలువలు గుడ్డులో పుష్కలంగా వుంటాయి. ముఖ్యంగా ఎదిగే పిల్లలకు కోడిగుడ్డు చాలినన్ని ప్రోటీన్లను అందజేస్తుంది. ప్రతిరోజూ గుడ్డ తినడం వల్ల ఎంతో ఆరోగ్యంగా వుంటారని వైద్యులు కూడా సలహాలిస్తుంటారు. గుడ్డులో వుండే పోషక విలువలు, ఆరోగ్య ప్రయోజనాలను గుర్తించి.. ప్రతియేటా అక్టోబర్ రెండో తేదీన వరల్డ్ ఎగ్ డే నిర్వహించడం కూడా జరుగుతోందంటే.. గుడ్డు ఎంత పౌష్టికాహారమో ఇట్టే తెలిసిపోతుంది. శరీరంలో ప్రతి అవసరం మీద గుడ్డు మంచి ప్రభావం చూపుతుందని నిపుణులు పరిశోధనల ద్వారా కనుగొన్నారు. గుడ్డును కేవలం ఉడికించి తినాలనే ప్రత్యేక నిబంధనలంటూ ఏమీ లేదు.. దానిని ఎన్నిరకాలుగా కావాలంటే అన్ని రకాల కూరలలో వేసుకుని తీసుకోవచ్చు.

గుడ్డులో లభించే పోషక విలువలు ఏ స్థాయిలో వుంటాయనే విషయాన్ని నిపుణులు కొన్ని పరిశోధనల ద్వారా ప్రజలకు తెలియజేశారు. క్యాలరీలు: 70-80, ప్రోటీన్లు : 6 గ్రాములు, క్రొవ్వులు: 5 గ్రాములు, కొలెస్టిరాల్‌: 190 గ్రాములు, నీరు: 87%, గుడ్డులో పలురకాల లవణాలు, అరుదైన లవణాలతో పాటు ఫాస్పరస్‌, అయోడిన్‌, సెలీనియం, ఐరన్‌, జింక్‌లు వంటి శరీరానికి మేలుచేసే ఎన్నోరకాల పోషక విలువలు కలిగి వుండటం వల్లే దీనిని ప్రతిరోజూ సేవించాలంటూ నిపుణులు బల్లగుద్దిమరీ చెబుతున్నారు. అంతెందుకు.. టీవీల్లో యాడ్ ల ద్వారా గుడ్డు తినాల్సిందిగా ప్రచారాలు ఇప్పటికీ జరుగుతూనే వున్నాయి.

గుడ్డుతో కలిగే ఉపయోగాలు :
1. మానవ శరీరానికి కావలసిన పోషక విలువలు ఇందులో పుష్కలంగా వుంటాయి. ముఖ్యంగా పిల్లల పెరుగుదలకు ఇది చాలా మంచిది.
2. రోజూ గుడ్డు తినడం వల్ల కంటి సమస్యలు చాలావరకు తగ్గి, దృష్టికి ఎంతో మేలు కలుగుతుంది. శుక్లాలు వచ్చే అవకాశాలు పూర్తిగా తగ్గిపోతాయి.
3. తక్కువ క్యాలరీల (80 క్యాలరీలు) శక్తిని అందిస్తుంది కాబట్టి.. శరీర బరువు అదుపు వుంచుతుంది. డైటింగ్ లో వున్నవారు దీనిని రెగ్యులర్ గా తీసుకుంటే చాలామంచిది.
4. మానవ శరీరానికి కావాల్సిన ప్రోటీన్లు గుడ్డులో వుంటాయి కాబట్టి.. గుడ్డు తినగానే కడుపు నిండినట్లుగా అనిపిస్తుంది. దీంతో పరిమిత ఆహారం తీసుకుని, శరీర బరువును నియంత్రించుకోగలుగుతారు.
5. గుడ్డుతినడం వల్ల గుండెజబ్బులు వస్తాయని గతంలో అపోహలు బాగానే షికార్లు చేశాయి... కానీ అటువంటిదేమీ లేదని తాజాగా నిపుణులు పరిశోధనల ద్వారా వెల్లడించారు.
6. గుడ్డుసొనలో 300 మైక్రోగ్రాముల కోలిన్ అనే పోషక పదార్థం.. మెదడు కణాలను ఆరోగ్యంగా కాపాడటంలో ప్రముఖపాత్రను వహిస్తుంది. మెదడు నుంచి సంకేతాలను వేగంగా చేరవేయడంలో కోలిన్ సహాయపడుతుంది.
7. శరీరానికి కావలసిన ఐరన్ గుడ్డులో పుష్కలంగా లభిస్తుంది. శరీరం ఆ ఐరన్ ను చాలా సులభంగా గ్రహిస్తుంది. అది గర్భిణీస్త్రీలకు, బాలింతలకు ఎంతో మేలు చేస్తుంది.
8. ప్రతిరోజు గుడ్డు తీసుకోవడం వల్ల లైపిడ్స్ లో ఎటువంటి మార్పులు రావడని.. శరీరానికి మేలు చేసే కొలెస్టిరాల్ శాతం పెరుగుతుందని తేలింది.
9. నిపుణులు నిర్వహించిన అధ్యయనం ప్రకారం.. ఒక వారంరోజుల వరకు గుడ్డును ఆహారంగా తీసుకున్న స్త్రీలకు.. రొమ్ము క్యాన్నర్ బారిన పడే అవకాశం 44 శాతం తగ్గినట్లు తేలింది.
10. గుడ్డులో వుండే సల్ఫర్, పలురకాల విటమిన్లు, లవణాల వల్ల శిరోజాలకు మంచి పోషణ లభిస్తుందని.. యవ్వనంలో కండరాలకు బలం ఎక్కువ ఏర్పడుతుంది, మనుషుల గోళ్లకు మంచి ఆరోగ్యాన్ని అందిస్తుందని తేలింది.