మొదటిసారి రెస్టారెంట్ కు వెళ్తున్నారా...

Posted: 02/24/2014 11:30 AM IST

మామూలుగా మనుషులు ఆహ్లాదకరంగా, ఉత్సాహంగా, తీరికగా తమ సమయాన్ని గడిపేందుకు పార్కులకు, రెస్టారెంట్లకు, సినిమాలకు లేదా విహారయాత్రలకు వెళుతుంటారు. కానీ వెళ్లిన చోట్లలో మనం ఎలా వుండాలి..? ఎలా ప్రవర్తించాలి..? అన్న విషయాలపై చాలామందికి అవగాహన వుండదు. మరికొందరైతే తత్తరపడుతూ భయపడిపోతుంటారు. అటువంటి సమయాలలో మనం కొన్ని విషయాలను తెలుసుకోవడం చాలా మంచిది. 

కొందరు రుచులను ఆస్వాదించడానికి రకరకాల హోటళ్లకు, రెస్టారెంట్లకు వెళుతుంటారు. కానీ అక్కడ అందరూ కొత్తవారు కాబట్టి వారితో ఎలా వ్యవహరించాలన్న పద్దతి చాలామందికి తెలియదు. కొత్తవారితో వెళ్లినప్పుడైతే తత్తరపడిపోతారు. కాబట్టి మనకు తెలిసినవాళ్లతో వెళితే చాలామంచిది. ఎవరైతే హోటళ్లకు తీసుకెళతారు, వారే బిల్లు చెల్లించి, ఆర్డరివ్వడం మర్యాదగా వుంటుంది. 

మనం సర్వర్ కు ఆర్డర్ ఇవ్వడానికి ముందు వారితో అసభ్యంగా ప్రవర్తించకూడదు. వారిని పిలిచేటప్పుడు హెలో, ఎక్స్యూజ్ మీ, ఓయ్ లాంటి శబ్దాలను కాకుండా వారిని సాధ్యమైనంతవరకు మర్యాదగా పిలవడం శ్రేయస్కరం. వాళ్ల డ్రెస్ మీద వున్న వాళ్ల పేర్లతో పిలిస్తే వారికి ఎంతో సంతోషం కలుగుతుంది. దాంతో వారు సర్వీస్ చేయడానికి కూడా ఉత్సాహంగా ముందుకు వస్తారు. 

ఒకవేళ సర్వర్ మనతో సరిగ్గా ప్రవర్తించకపోతే అతని మేనేజర్ కు ఇన్ ఫార్మ్ చేయడం మంచిది. గందరగోళ పరిస్థితులను ఏర్పడేలా చేయకూడదు. వంటకాలు సరిగా లేకపోతే సర్వర్ బాయ్ ని పిలిచి.. అనవసరంగా తిట్టడం వంటి విషయాలు చేయకూడదు. సర్వర్ మనతో సరిగ్గా నడుచుకుంటే అతనికి టిప్ ఇస్తే ఇంకా మంచిది. 

స్త్రీలతో వెళుతున్నప్పుడు వారితో కొంచెం జాగ్రత్తగానే వ్యవహరించాలి. వారితో వాగ్వాదం చేయకూడదు. ఎక్కువ అరవడం, ఫోన్లలో గట్టిగా మాట్లాడడం వంటి విషయాలు చేయకూడదు. ఇతరులకు ఇబ్బంది కలగకుండా చూసుకోవాలి. ఇలాగే సినిమా హాళ్లలో కూడా ఇటువంటి పొరపాట్లు కాకుండా చూసుకోవాలి.