సైనా టైటిల్ ఓడిపోయినా.. ప్రశంసించిన కేసీఆర్

Posted: 03/09/2015 12:22 PM IST

భారత స్టార్ షట్లర్ సైనా నెహ్వాల్ ‘ఆల్ ఇంగ్లండ్ బ్యాడ్మింటన్’ టోర్నీల్ ఫైనల్ కు చేరి చరిత్ర సృష్టించిన విషయం తెలిసిందే! ఇంతవరకూ ఏ భారతీయ మహిళ సాధించని ఈ ఘనతను సైనా సాధించడంతో.. ఇక టైటిల్ కూడా గెలుస్తుందని అంతా ఆశించారు. కానీ.. అంతలోనే అందరి ఆశలు అడియాశలయ్యాయి.

ఫైనల్లో జరిగిన టైటిల్ పోరులో సైనా తన శక్తిమేర ప్రయత్నించినప్పటికీ ఆమె గెలవలేకపోయింది. తొలి సెట్ లో అద్భుతంగా రాణించింది కానీ.. తర్వాత ప్రత్యర్థి పుంజుకోవడంతో ఆమె ఓటమిపాలయ్యింది. దీంతో భారతీయులంతా ఒక్కసారిగా నిరాశ చెందారు. అయితే.. ఆమె ఫైనల్ వరకు చేరి చరిత్ర సృష్టించడం ఎంతో సాహసమంటూ ప్రముఖులంతా ఆమెకు కితాబిచ్చారు.

ఈ నేపథ్యంలోనే తెలంగాణ సీఎం కేసీఆర్ కూడా సైనా నెహ్వాల్ పై ప్రశంసల వర్షాన్ని కురిపించారు. టైటిల్ పోరులో సైనా ఓడిపోయినా.. టోర్నీ మొత్తంలో ఆమె ప్రదర్శన ఎంతో అద్భుతమని ఆయన అన్నారు. ‘ఇప్పటివరకు ఏ భారతీయ మహిళకూ సాధ్యం కానిది.. సైనా సాధించింది’ అంటూ ఆయన పేర్కొన్నారు. అందుకు సగటు భారతీయులంతా గర్వపడాలంటూ ఆయన అభిప్రాయం వ్యక్తం చేశారు.

ఇక ఈయనతోపాటు ఇతర క్రీడా ప్రముఖులు సైనాను ప్రశంసించారు. టోర్నీలో సైనా ప్రదర్శన ఎంతో అమోఘమంటూ తెలిపారు. అలాగే సోషల్ మీడియాలో కూడా ఈ షట్లర్ ను పొగడ్తలతో ముంచెత్తారు.