మరో రికార్డును అందుకునేందుకు ధోని రెడీ..

Posted: 06/27/2018 04:38 PM IST

Ms dhoni knocking at the door of another record

టీమిండియా మాజీ కెప్టెన్ ఎంఎస్ ధోని అరుదైన రికార్డు అందుకునేందుకు చేరువయ్యాడు. భారత్‌ తరఫున ఈ రికార్డును ఇప్పటి వరకు సచిన్‌ టెండుల్కర్‌, రాహుల్‌ ద్రవిడ్‌ మాత్రమే అందుకోగలిగారు. ఏమిటా రికార్డు అంటే.. టీమిండియా తరపున అంతర్జాతీయ క్రికెట్ లో మూడు ఫార్మాట్‌లలో కలిపి 500లు, ఆపైన మ్యాచ్‌లు ఆడటం. ప్రస్తుతం ధోనీ 497 (వన్డేలు-318, టెస్టులు-90, టీ20లు-89) మ్యాచ్ లతో ఉన్నాడు. టెస్టు క్రికెట్ కు వీడ్కోలు పలికిన ధోనీ ఐర్లాండ్ తో రెండు టీ20లు, ఇంగ్లాండ్తో 3 టీ20లు, మూడు వన్డేలు ఆడనున్నాడు.

ఈ ఎనిమిది మ్యాచుల్లో ఆడితే అంతర్జాతీయ క్రికెట్లో ధోనీ ఆడిన మ్యాచుల సంఖ్య 505కు చేరనుంది. ఐర్లాండ్ తో రెండు టీ20లతో పాటు జులై 3న ఇంగ్లాండ్‌తో టీ20 ఆడనున్నాడు. ఈ మూడు మ్యాచ్లు ఆడితే ధోనీ 500 మ్యాచుల క్లబ్‌లో చేరనున్నాడు. కాగా, మాస్టార్ బ్లాస్టర్ సచిన టెండుల్కర్ 664 (టెస్టులు 200, వన్డేలు 463, టీ20-1) మ్యాచులతో అగ్రస్థానంలో వున్నాడు. ఆ తరువాతి స్థానంలో రాహుల్ ధ్రావిడ్ 509(టెస్టులు-164, వన్డేలు-344, టీ20-1) మ్యాచులతో రెండో స్థానంలో ఉన్నాడు.

కాగా, ధోని ఐర్లాండ్, ఇంగ్లాండ్ పర్యటనల ద్వారా వారి రికార్డులకు చేరువ కానున్నాడు. అయితే త్వరలో ధోనీ భారత్‌ తరఫున 500 మ్యాచులు ఆడిన మూడో ఆటగాడిగా రికార్డు నెలకొల్పనున్నాడు. ఇక ఈ ఏడాది సెప్టెంబరులో భారత్‌ ఆసియా కప్‌ ఆడనుంది. ఈ టోర్నీలో ధోనీ ఆడితే ద్రవిడ్‌ రికార్డును బద్దులకొట్టే అవకాశం ఉంది. అన్ని దేశాల క్రికెటర్లతో పోల్చుకున్నా సచిన్‌దే అగ్రస్థానం. ఆ తర్వాతి స్థానంలో శ్రీలంక ఆటగాడు మహేల జయవర్ధనే(652) ఉన్నాడు. కుమార సంగాక్కర (594) మూడో స్థానంలో ఉండగా.. మహేంద్ర సింగ్‌ ధోనీ పదో స్థానంలో కొనసాగుతున్నాడు.