పాదాభివందనంతో సచిన్ అశిర్వాదం పోందిన యువరాజ్

Posted: 05/09/2016 06:50 PM IST

విశాఖలో సన్ రైజర్స్ హైదరాబాద్ తో జరిగిన మ్యాచ్ లో ప్రేక్షకులకు ఓ అరుదైన దృశ్యానికి సాక్షిగా నిలిచారు. భారత క్రికెట్ అభిమానులకు మాస్టర్ బ్లాస్టర్ సచిన్ టెండుల్కర్ అంటే  క్రికెట్ దేవుడు. కేవలం క్రికెట్ అభిమానులకే కాదు సచిన్ రమేష్ టెండుల్కర్ అంటే క్రికెటర్లకు, ముఖ్యంగా టీమిండియా క్రికెటర్లకు కూడా ఆరాధ్యుడే. సచిన్ టెండూల్కర్ అంటే యువరాజ్ సింగ్ కు ఎనలేని గౌరవం. యువీ సచిన్ ను ఎంతో అభిమానిస్తాడు. వేలాదిమంది అభిమానుల సమక్షంలో యువీ.. మాస్టర్ కు పాదాభివందనం చేసి తన గౌరవాన్ని చాటుకున్నాడు. వైజాగ్ లో ముంబై ఇండియన్స్, హైదరాబాద్ సన్ రైజర్స్ మ్యాచ్ సందర్భంగా ఈ సన్నివేశం చోటుచేసుకుంది.
 
హైదరాబాద్ సన్ రైజర్స్ జట్టుకు యువీ ప్రాతినిధ్యం వహించగా, ముంబై ఇండియన్స్ కు సచిన్ మెంటర్ గా ఉన్నాడు. వైజాగ్ లో ఇరు జట్ల మధ్య జరిగిన మ్యాచ్ లో సన్ రైజర్స్ జట్టు విజయం సాధించింది. ఈ మ్యాచ్ అనంతరం యువీ సచిన్ దగ్గరకు వెళ్లి కాళ్లకు నమస్కారం చేశాడు. ఈ మ్యాచ్ యువరాజ్ కి వందో ఐపీఎల్ మ్యాచ్. యువీ 23 బంతుల్లో 39 పరుగులు చేయడం సంతోషంగా ఉందని సచిన్ ప్రశంసించాడు. కాగా యువీ సచిన్ కు పాదాభివందనం చేయడమిదే తొలిసారి కాదు. 2014 జులైలో లండన్ లోని లార్డ్స్  ద్విశతసంవత్సరాల వేడుకల సందర్భంగా జరిగిన మ్యాచ్ లో యువీ  సచిన్ పాదాలకు నమస్కరించాడు.

మనోహర్