జడేజాపై ఐసీసీకి కౌంటర్ దాఖలు చేసిన ఇంగ్లాండ్

Posted: 07/16/2014 04:47 PM IST

Wales cricket board counter attack on jadejas

ప్రస్తుతం ఇండియా క్రికెట్ జట్టు ఇంగ్లాండ్ టూర్ లో వున్న సంగతి తెలిసిందే! ఇందులో భాగంగానే ఇండియా - ఇంగ్లాండ్ జట్టు మధ్య ఒక టెస్ట్ మ్యాచ్ కూడా అయిపోయింది. అయితే ఈ మ్యాచ్ నేపథ్యంలో భారత క్రికెట్ స్పిన్నర్ జడేజా, ఇంగ్లాండ్ పేసర్ జిమ్మీ అండర్ సన్ మధ్య వాగ్యుద్ధం జరిగింది. దీనిపై టీమిండియా మేనేజ్ మెంట్ మండిపడింది.

ట్రంట్ బ్రిడ్జ్ టెస్ట్ సందర్భంగా రవీంద్రా జడేజాను ఇంగ్లండ్ పేసర్ జిమ్మీ అండర్సన్ దూషించినట్టు టీమిండియా మేనేజ్ మెంట్ అతడినపై రిఫరీకి ఫిర్యాదు చేసింది. ఆ మ్యాచ్ సందర్భంగా రెండో రోజు మైదానం నుంచి వెలుపలికి వస్తున్న సందర్భంలో.. అండర్సన్, జడేజాను ఉద్దేశించి నోరు పారేసుకున్నాడు. దీంతో అది పెద్ద వివాదంగా మారిపోయింది. ఆ సమయంలో జడేజా కూడా అతనికి ధీటుగానే సమాధానం ఇచ్చాడు. అయితే పరదేశంలో ఒక ఆటగాడ్ని ఇలా దూషించడం ఎంతవరకు సమంజసమని భావించిన ఇండియా మేనేజ్ మెంట్ అతనిపై ఆగ్రహంతో ఫిర్యాదు చేశారు.

ఈ విషయంపై భారత జట్టు మేనేజర్ అయిన సునీల్ దేవ్ ఫిర్యాదు చేయడంతో ఐసీసీ విచారణ చేపట్టేందుకు ఉపక్రమించింది. ఐసీసీ నియమావళి ప్రకారం అండర్సన్ పై లెవల్ 3 అభియోగాలు మోపారు. ఇదిలా వుండగా.. తమ పేసర్ జిమ్మీపై ఈ విధంగా లెవల్ 3 అభియోగాలు మోపడంతో ఇంగ్లాండ్ అండ్ వేల్స్ క్రికెట్ బోర్డు (ఈసీబీ) కూడా కౌంటర్ కు సిద్ధమైంది. జడేజా, అండర్సన్ పై చేస్తున్న ఆరోపణలను సవాల్ చేయాలని నిర్ణయించుకుంది. ఒకవేళ అండర్సన్ తప్పు చేసినట్లు రుజువైతే.. అతనిపై 4 టెస్టులు లేదా 8 వన్డే మ్యాచులు నిషేధం విధించే అవకాశం వుందని చెబుతున్నారు.