అమావాస్యరోజు ముగ్గులు ఎందుకు వేయకూడదు?

Posted: 04/07/2014 05:04 PM IST

సాధారణంగా మహిళలు ప్రతిరోజు ఉదయాన్నే లేవగానే ఇంటిముందు వున్న చెత్తను శుభ్రం చేసుకుంటారు. ఆ తరువాత నీటిని చల్లుకుని, ముగ్గులు వేసి అందంగా అలంకరించుకుంటారు. దీంతో ఆ ప్రాంతమంతా ఎంతో ఆకర్షణీయంగా, అందంగా కనిపిస్తుంది. అయితే అమావాస్య తిథి రోజునాడు ఇంటిముందు ముగ్గులు వేయకూడదని పండితులు బల్లగుద్దిమరీ హెచ్చరిస్తున్నారు. 

అమావాస్యకు ముందురోజు పితృదేవతలు మన గృహానికి వస్తారని చెబుతున్నారు. ఆ సమయంలో పితృదేవతలకు అర్ఘ్యమిస్తే.. వంశాభివృద్ధి, అష్ట ఐశ్వర్యాలు చేకూరుతాయని పురోహితులు పేర్కొంటున్నారు. ఆరోజు ఇంటిముందు వున్న చెత్తను శుభ్రం చేసుకుని, నీటిని చల్లుకోవచ్చు కానీ ముగ్గులు వేయకూడదని వారు చెబుతున్నారు. 

ఒకవేళ ముగ్గులు వేస్తే.. పితృదేవతలు ఇంట్లోకి రాకుండా వాకిలితోనే ఆగిపోతారని పండితులు పేర్కొంటున్నారు. అందువల్ల అమావాస్యరోజు పితృదేవతలను మనసారా ప్రార్థించి, దేవతామూర్తులకు నైవేద్యాలు, కర్పూరహారాలు ఇవ్వాలని వారు సూచిస్తున్నారు. 

పితృదేవతలకు ఎంతో ప్రీతికరమైన అమావాస్యనాడు.. దేవతలను స్మరించినా ఫలితం వుండదంటున్నారు పండితులు. ఆరోజు దేవతలకు సమానంగా పితృదేవతలను కూడా కొలిస్తే.. సకల సంపదలు చేకూరుతాయని ప్రగాఢంగా విశ్వసిస్తున్నారు.