తొలి ఏకాదశి విశేషాలు

Posted: 04/23/2014 04:23 PM IST

ఆషాఢమాసంలోని పౌర్ణమిరోజుకు ముందు వచ్చే ఏకాదశిని తొలి ఏకాదశి అంటారు. ఈ తొలి ఏకాదశిని ఎంతో ఆధ్యాత్మికంగా ఒక పర్వదినంలా జరుపుకుంటారు. తొలి ఏకాదశిని ‘‘ఆషాఢ ఏకాదశి’’, ‘‘శయన ఏకాదశి’’ అనే పేర్లతో కూడా పేర్కొంటారు. హిందువుల సంప్రదాయాల ప్రకారం వచ్చే తిథుల్లో ఈ ఏకాదశి ఎంతో మంచిది. అందులో తొలి ఏకాదశిని ఎంతో పవిత్రంగా భావిస్తారు భక్తులు. ఎందుకంటే.. విష్ణుమూర్తిని కొలిచే విష్ణుభక్తులకు ఈ తొలిఏకాదశి రోజు ఎంత ప్రీతికరమైనది విశ్వసిస్తారు. అలాగే చాతుర్మాస్య వ్రతం కూడా ఈరోజు నుంచి అంటే తొలి ఏకాదశిరోజు నుంచి ప్రారంభమవుతుంది. అందువల్లే తొలి ఏకాదశిరోజుకు హిందువులు ఎంతో ప్రాధాన్యతను ఇస్తారు.

పురాణ కథనాల ప్రకారం.. విష్ణుమూర్తి క్షీరసాగరంలోని శేషతల్పం మీద హాయిగా నిద్రపోయి.. తొలిఏకాదశినాడు నిద్రను ఉపక్రమించాలని (నిద్రలేవడం) అనుకున్నాడట. అలా ఆ విధంగా పడుకున్న విష్ణుమూర్తి.. నాలుగు నెలల తరువాత వచ్చే ప్రబోధినీ ఏకాదశినాడు మేలుకున్నాడట. దాంతో ఈ నాలుగు నెలల్ని చాతుర్మాసాలుగా పేర్కొంటారు. తొలిఏకాదశి పండుగను కూడా సంక్రాంతి, దసరా లాంటి పెద్ద పండుగల్లాగే జరుపుకుని.. ఆరోజు ఉపవాసం వుంటారు.

ముఖ్యంగా ‘‘తొలిఏకాదశి’’ రైతులకు ఎంతో ఆధ్యాత్మికమైన పండుగ రోజు. ఈ పర్వదినంరోజు రైతులు తమ నాగలి, గునపము, ఇంకా మొదలైన పరికరాలకు పూజా కార్యక్రమాలను నిర్వహించుకుంటారు. వారు చేసుకునే పనులలో ఎటువంటి ఇబ్బందులు, సమస్యలు రాకుండా వుండటానికే, అలాగే అతివృష్టి, అనావృష్టి వంటి ప్రకృతి వైపరీత్యాలు చోటు చేసుకోకూడదని ఇలా ఈ విధంగా పూజలు చేస్తారు. ఇంతటి పవిత్రమైన రోజున ఏవైనా పనులు నిర్వహించుకుంటే అవి విజయవంతం అవుతాయని రైతులు, ఇతర చేతివృత్తులవారు ప్రగాఢంగా విశ్వసిస్తారు.

ఈ తొలిఏకాదశి పర్వదినంనాడు.. మొక్కజొక్క పేలాలను మెత్తగా దంచి, పొడిగా చేసుకుంటారు. అందులో నూరిన బెల్లంను కలిపి దేవుడికి నైవేద్యంగా సమర్పించుకుని, ప్రసాదంగా తీసుకుంటారు.