ప్రస్తుతకాలంలో ప్రతిచిన్న పనికి డబ్బు అవసరం అవుతుంది అనడంలో ఎటువంటి అనుమానం లేదు. అందుకే ప్రతిఒక్కరు తమ భవిష్యత్తులో ఎటువంటి కష్టాలు రాకుండా ముందుగానే డబ్బులను పొదుపు చేసుకుంటుంటారు. 

అయితే కొంతమంది ఇళ్లలో ఎంత సంపాదించినా ఒక్క రూపాయి కూడా మిగలని పరిస్థితులు కనిపిస్తుంటాయి. సరైన ప్రణాళికలు లేకుండా ఖర్చు పెట్టకపోవడం లేదా అనవసరమైన ఖర్చు చేయడం వల్ల కొందరి ఇళ్లలో డబ్బు మిగలదు. 

వాస్తుశాస్త్రాల ప్రకారం.. ఇంటికి సరైన వాస్తు లేకపోవడం వల్ల కూడా సంపాదన అనేది స్థిరంగా వుండదని వాస్తునిపుణులు బల్లగుద్దిమరీ చెబుతున్నారు. డబ్బును పొదుపు చేసుకోవడానికి వాస్తుపరమైన కొన్ని సూచనలు కొన్నింటిని వారు సూచిస్తున్నారు. 

సూచనలు... 

ఇంటికున్న నైరుతి మూలలో ఎటువంటి సెప్టిక్ ట్యాంక్ గానీ, బోర్ వెల్ గానీ లేకుండా చూసుకుంటే.. ఇంట్లో ధనం నిలుస్తుందని వారు సలహా ఇస్తున్నారు. అలాగే విలువైన పత్రాలను, వస్త్రాభరణాలను పెట్టే బీరువాలు, లాకర్లను వాస్తు ప్రకారం పెట్టుకోవడం చాలా మంచిది. తూర్పు ముఖంగా పశ్చిమంగావున్న గోడలకు వీటిని పెట్టుకోవడం ఉత్తమం. 

లేకపోతే తూర్పు లేదా ఉత్తరముఖంగా తలుపు తెరుచుకునేలా నైరుతి మూలలో వుంచాలి. లాకర్లు ఉత్తర ముఖం తెరుచుకునేలా దక్షిణపు గోడవైపు పెట్టడంతో అదృష్టం కలిసి వస్తుంది. లాకర్ ముఖం ఉత్తరంవైపు తెరుచుకోవడం మంచిది. ఎందుకంటే.. వాస్తుప్రకారం ఈ దిక్కుకి అధిపతి కుబేరుడు. 

బీరువాను ఈశాన్య, ఆగ్నేయ, వాయువ్య దిక్కులలో వుంచుకోవడం అంత మంచిది కాదు. ఎందుకంటే దీనివల్ల అనవసర ఖర్చులు ఎక్కువ అయి.. సంపద నష్టం జరుగుతుంది. అలాగూ బీనేవాపే దూలం కింద వుండకుండా చూసుకోవాలి. ఎందుకంటే.. ఆర్థిక స్థిరత్వం మీద ఒత్తిడి పడే అవకాశాలుంటాయి. 

ఎంత కష్టపడినా సంపాదించిన డబ్బు నిల్వవుండకపోవడం లేదా వృద్ధి చెందకపోతే.. అటువంటి ఇళ్లలో రాత్రంతా కనీసం ఒక దీపాన్నైనా వెలిగించాలి. ఇంట్లో చేపల ఎక్వేరియం పెట్టుకోవడం కూడా సంపద వృద్ధికి తోడ్పడుతుంది. ఈ ఎక్వేరియంను గదిలో నైరుతి దిక్కులో వుంచుకోవడం చాలా మంచిది. 

ఇంటిముఖద్వారానికి మంచి రంగులు వేయడంతో సంపద సమకూరే అవకాశాలుంటాయి. ఇంటికి గాజు కిటికీలు వుంటే.. అవి నిత్యం పరిశుభ్రంగా వుండే విధంగా చూసుకోవాలి. కిటికీలకు క్రిస్టల్స్ వేలాడదీయడం వల్ల శక్తి చురుకుగా ప్రవహిస్తుంది. 

ఆదాయం కన్నా ఖర్చులు ఎక్కువగా వుంటే.. మొక్కలను లేదా విత్తనాలను టాయిలెట్లలో వుంచుకోవాలి. ఇంట్లో అస్సలు డబ్బులు నిలబడకుండా వుంటే.. ఇంటి ఎడమ మూలన బాగా బరువుగా వుండే వస్తువులను వుంచాలి. దాంతోపాటు ఆ ప్రదేశంలో వెలుతురు ఎక్కువగా వచ్చేలా చూసుకోవాలి.