Posted: 07/09/2012 02:46 PM IST

      పీకల్లోతు కష్టాల్లో కూరుకుపోయిన కింగ్‌ఫిషర్ ఎయిర్‌లైన్స్ మూతపడే దిశగా కన్పిస్తోంది. ఇప్పటికే రోజువారీ సర్వీసులను నిర్వహించటానికి తంటాలు పడుతున్న కింగ్‌ఫిషర్... మున్ముందు కూడా కోలుకునే పరిస్థితి కన్పించకపోవటంతో కంపెనీ ఫ్లైయింగ్ లైసెన్స్‌ను సస్పెండ్ చేయాలని విమానయాన మంత్రిత్వ శాఖ భావిస్తున్నట్లు తెలుస్తోంది. మరోవైపు కంపెనీ ఆర్దిక పరిస్థితిలో ఎలాంటి మార్పు లేకపోవటంతో సంస్థ పూర్తి పరిస్థితిని డైరెక్టరేట్ జనరల్ ఆఫ్ సివిల్ ఏవియేషన్ (డిజిసిఎ) ఫైనల్ నిర్ణయం చేస్తోంది. షెడ్యూల్ ప్రకారం సర్వీసులను నడపలేకపోతుండటంతో కింగ్‌ఫిషర్ ఫ్లైయింగ్ లైసెన్స్‌ను సస్పెండ్ చేయాలని భావిస్తున్నట్లు విమానయాన మంత్రిత్వ శాఖ ఉన్నతాధికార వర్గాలు తెలిపాయి. కంపెనీ ఇప్పటికే ఉద్యోగులకు కొన్ని నెలలుగా జీతాలు చెల్లించటం లేదని తాము వీటన్నిటిని దృష్టిలో ఉంచుకుని త్వరలోనే ఒక నిర్ణయం తీసుకోనున్నామని అంటున్నారు. కింగ్‌ఫిషర్ ఎయిర్‌లైన్స్‌కు మొత్తం 643 ఎయిర్‌క్రాఫ్ట్‌లుండగా ఇందులో 20 విమానాలు స్పేర్స్, ఇంజిన్, కాంపోనెంట్లు లేకపోవటంతో నిలిచిపోయాయని డిజిసిఎ గత డిసెంబర్‌లో తెలిపింది. ఇటీవలి కాలంలో తాకట్టు పెట్టిన విమానాలను కూడా ఆయా సంస్థలు వెనక్కు తీసేసుకోవటంతో ప్రస్తుతం కింగ్‌ఫిషర్ ఎయిర్‌లైన్స్ 20 కంటే తక్కువ విమాన సర్వీసులను నడుపుతోంది. మరోవైపు కింగ్‌ఫిషర్ ఎయిర్‌లైన్స్ నుంచి రావాల్సిన బకాయిలు భారీగా పేరుకుపోవటంతో ఎయిర్‌పోర్ట్స్ అథారిటీ ఆఫ్ ఇండియా (ఎఎఐ), బ్యాంకులు, ఆదాయ పన్ను శాఖలు చర్యలు తీసుకోవాలని యోచిస్తున్నాయి. వీటన్నిటిని దృష్టిలో ఉంచుకుని సాధ్యమైనంత త్వరలో నిర్ణయం తీసుకోవాలని డిజిసిఎ భావిస్తోంది.

...avnk