Posted: 03/31/2012 05:50 PM IST

 

రాముణ్ణి స్మరించే పెదాలకు వేరే పానకం ఎందుకు?
రాముణ్ణి ప్రతిష్ఠించుకున్న హృదయానికి వేరే కోవెలెందుకు?
రాముడి మార్గంలో నడిచేవారికి వేరే దారి ఎందుకు?
రాముడి ధర్మాన్ని ఆచరించేవారికి వేరే ధర్మం ఎందుకు?
శ్రీరామనవమికి తెలుగువారి లోగిళ్లు కళకళలాడతాయి.
తెలుగు వీధులకు చలువపందిళ్లు గొడుగు పడతాయి.
హరికథలు... బుర్రకథలు... పాటలు...
శ్రీరామ నీ నామమెంతో రుచిరా...
పండగ పూట...ఈ వడపప్పు... పానకం... ఇంకొంత తీపి.
శ్రీరామ నీ నామమెంతో రుచిరా...
పండగ పూట...ఈ వడపప్పు... పానకం... ఇంకొంత తీపి.

పానకం - వడపప్పు... ఎందుకు?

మన ప్రసాదాలన్నీ సమయానుకూలంగా, దేహారోగ్యాన్ని బట్టి నిర్ణయించినవే. వడపప్పు - పానకం కూడా అంతే. శరదృతువు, వసంత రుతువులు యముడి కోరల్లాంటివని దేవీభాగవతం చెబుతోంది. ఈ రుతువులో వచ్చే గొంతువ్యాధులకు... పానకంలో ఉపయోగించే మిరియాలు, ఏలకులు ఉపశమనాన్ని ప్రసాదిస్తాయని, ఔషధంలా పనిచేస్తాయని లౌకికంగా చెబుతారు. పానకం విష్ణువుకి ప్రీతిపాత్రమైనదని చెబుతారు.

పెసరపప్పు శరీరంలోని ఉష్ణాన్ని తగ్గించి, చలవ చేస్తుంది. జీర్ణశక్తిని వృద్ధిచేస్తుంది. దేహకాంతికి, జ్ఞానానికి ప్రతీక. పెసరపప్పును ‘వడ’పప్పు అంటారు. అంటే మండుతున్న ఎండల్లో ‘వడ’ కొట్టకుండా వేడి నుంచి కాపాడుతుందని అర్థం. పెసరపప్పు బుధగ్రహానికి ప్రీతిపాత్రమైనది. పూర్వీకులకు పెసరపప్పు ఎంతో ప్రశస్తమైనది.

పానకం

కావలసినవి : బెల్లం – 100గ్రా. ఏలకుల పొడి – అర టీ స్సూన్, నల్ల మిరియాల పొడి – టీ స్సూన్ , నీళ్లు - అర లీడర్, అల్లం రసం – అర టీ స్సూన్.

తయారి : బెల్లం నీళ్లలో నానబెట్టి, కరిగాక వడ కట్టాలి. వడకట్టిన బెల్లపునీటిలో ఏలకుల పొడి, మిరియాల పొడి, అల్లం రసం కలపాలి.

‘వడ’పప్పు

కావలసినవి: పెసరపప్పు - అర కప్పు, కీరా - ఒక ముక్క, పచ్చిమిర్చి - 1 (తరగాలి), కొత్తిమీర తరుగు- టీ స్పూన్, కొబ్బరి తురుము -టేబుల్ స్పూన్, ఉప్పు - తగినంత

తయారి:  పెసరపప్పును నాలుగు గంటలు నీళ్లలో నానబెట్టాలి. నీటిని వడకట్టేసి, పప్పు ఒక గిన్నెలో వేయాలి. దాంట్లో కీరా తరుగు, పచ్చిమిర్చి, కొత్తిమీర, కొబ్బరి, ఉప్పు వేసి కలపాలి.