మాట నిలబెట్టుకుంటున్న మెగా ప్రొడ్యూసర్

Posted: 01/26/2018 03:42 PM IST

టాలీవుడ్ కు సంబంధించిన వ్యవహారాల్లో మెగా ప్రొడ్యూసర్ అల్లు అరవింద్ ఎంత క్రియాశీలకంగా ఉంటారో తెలియంది కాదు. అయితే సామాజిక సేవల విషయంలో మాత్రం ఆయన అంతే గోప్యత ప్రదర్శిస్తారు. తాజాగా ఆయన చేస్తున్న ఓ మంచి పని వెలుగులోకి వచ్చింది.

కొన్నేళ్ల క్రితం ఏఎస్ బీపీ స్కూల్ కమిటీ తరపున నిర్వహించిన గణతంత్ర్య దినోత్సవ వేడుకలకు అల్లు అరవింద్ ముఖ్యఅతిథిగా హాజరయ్యారు. ఆ సందర్భంలో పాఠశాలల అభివృద్ధి కోసం 25,000 రూపాయలు విరాళంగా ఇచ్చారు. అంతేకాదు ఇకపై ప్రతీ ఏడాది అలాగే సాయం చేస్తానని ప్రకటించారు కూడా.

అన్న మాట ప్రకారం అలాగే సాయం చేస్తూ వస్తున్నారు కూడా. ఈ ఏడాది ఫీల్ ఖానా పరిధిలోని కన్య విద్యా సమితి వారికి 25 వేల రూపాయల చెక్కును అందజేయగా.. ఆయనకు కృతజ్నతలు తెలియజేస్తూ సదరు సమితి వాళ్లు ఓ ప్రకటన కూడా విడుదల చేశారు. ఇన్నాళ్లుగా అల్లు అరవింద్ చేస్తున్న ఈ గుప్త సాయంపై ఇండస్ట్రీలో ఇప్పుడు ప్రత్యేక ప్రశంసలు కురుస్తున్నాయి.