చైన్ స్నాచర్ను ఓ మహిళ పరుగెత్తి పట్టుకుందని...

Posted: 12/01/2014 06:45 PM IST

ఈమధ్య చైన్ స్నాచర్’లా ఆగడాలు మితిమీరిపోతున్నాయి. మహిళల గొలుసులను కొట్టేయడంతోబాటు వారికి హాని కలిగిస్తున్నారు. తమ వెనుక పరుగెత్తుకుంటూ రాకూడదనే ఉద్దేశంతో చైన్ లాగేసుకున్న తర్వాత కిందపడేసి మరీ పారిపోతున్నారు దుర్మార్గులు! పైగా గొలుసు కొట్టేశారన్న భయంతో మహిళలు కంగారుతో ఏంచేయాలో బిత్తరపోతారు. కానీ ఇక్కడ సీన్ మొత్తం రివర్స్’లో జరిగింది. తన గొలుసు కొట్టేసిన వాడిని ఓ మహిళ ధైర్యంగా వెంటే పరుగెత్తి పట్టుకుని, పోలీసులకు అప్పగించి పదిమందికి ఆదర్శంగా నిలిచింది.

వివరాల్లోకి వెళ్తే.. హరిద్వార్ నగరంలో ప్రైవేటు ట్యూషన్లు చెప్పుకొనే నిర్మలా పండిట్ అనే మహిళ.. ఇండోర్’లో వుండే తన బంధువుల ఇంటికి వచ్చింది. సరదాకోసం బయటకు వెళ్లినప్పుడు ఓ వ్యక్తి వచ్చి ఆమె మెడలో ఉన్న గొలుసు కొట్టేసి పారిపోయేందుకు ప్రయత్నించాడు. అయితే.. అందరి మహిళల్లా భయపడకుండా ఆమె ధైర్యంగా అతడిని కిలోమీటరు దూరం వరకు పరిగెత్తి పట్టుకుంది. అనంతరం అతడిని పోలీసులకు అప్పగించింది. ఆమె ధైర్యానికి మెచ్చుకున్న పోలీసులు 10 వేలరూపాయల రివార్డుతో సత్కరించారు.

అందరూ మహిళలు కూడా ఇలాగే ధైర్యంగా ఎదుర్కుంటే.. చైన్ స్నాచర్ల బెడద నుంచి తమను తామే రక్షించుకున్నట్లవుతారు. అలాకాకుండా ఇంకా భయపడుతూనే వుంటే.. దుండగులు తమ పని సునాయాసంగా చేసుకుని వెళ్లిపోతారు. ఆమెను ఆదర్శంగా తీసుకుని అందరూ మహిళలు అలాగే చేస్తే దుండగుల భరతం పట్టొచ్చని పోలీసులు సూచించారు.

AS