కటకటాల వెనక్కి ఓబులేషుసహా మరో ముగ్గురు..

Posted: 11/20/2014 06:54 PM IST

Kbr park firing accused constable obuleshu arrested along with three members with proves

బుధవారం (19-11-2014)నాడు అరబిందో ఫార్మా వైస్ ఛైర్మన్ నిత్యానందరెడ్డిపై ఓ అగంతకుడు కాల్పులు జరిపి పరారైన సంగతి తెలిసిందే! ప్రతిరోజూ ప్రశాంతంగా వుండే కేబీఆర్ ప్రాంతం.. ఆ కాల్పులతో ఒక్కసారిగా దద్దరిల్లిపోయింది. దీంతో రంగంలోకి దిగిన పోలీసులు.. వెంటనే ఘటనాస్థలానికి చేరుకుని అక్కడ లభించిన ఏకే47 తుపాకీతోపాటు కొన్ని ఆధారాలను స్వాధీనం చేసుకున్నారు.

అలాగే ఆ తతంగమంతా రికార్డైన సీసీటీవీ ఫుటేజీ దృశ్యాలను చూసిన నిత్యానందరెడ్డి, పోలీసులు అతడు కానిస్టేబుల్ ఓబులేసు అని గుర్తించారు. అంతే! ఆలస్యం చేయకుండా అతనెక్కడున్నాడో సమాచారాన్ని అందుకున్న పోలీసులు.. బుధవారం సాయంత్రమే అనంతపురంలో టాస్క్ ఫోర్స్ పోలీసులు అదుపులోకి తీసుకున్నారు. సాక్ష్యాలను క్షుణ్ణంగా పరిశీలించిన అనంతరం కాల్పులు జరిపింది అతడేనని నిర్ధరణకు వచ్చారు. ఈ కేసులో అతనితోపాటు మరో ముగ్గురి పాత్ర కూడా వున్నట్లు దర్యాప్తులో బయటపడింది.

కాల్పుల ఘటన అనంతరం ఓబులేసు జింఖానా క్లబ్ పక్కనుంచి జారుకుని హైదరాబాద్ నుంచి బెంగళూరు వెళ్లే బస్సులో పరారైనట్లు గుర్తించారు. ఫోన్ సిగ్నల్స్ ఆధారంగా అతడు కర్నూలు-అనంతపురం సరిహద్దులో పోలీసులు అదుపులోకి తీసుకున్నారు. కాగా, పోలీసులు ఈ కేసును కేవలం 24 గంటల్లోనే ఛేధించడం విశేషంగా చెప్పుకుంటున్నారు. ఓబులేసుతోపాటు మరో ముగ్గురు నిందితులు కూడా పోలీసుల అదుపులో వున్నట్లు సమాచారం! 1998లో ఏపీఎస్పీ బ్యాచ్ కు ఎంపికైన ఓబులేసు.. గత మార్చి నుంచి అంబర్’పేట సీపీఎల్’లో కానిస్టేబుల్’గా పనిచేస్తున్నాడు.