కాంగ్రెస్ లో చేరిన సినీ నటుడు

Posted: 11/05/2014 08:38 PM IST

సీనియర్ నటుడు కార్తిక్ కాంగ్రెస్ పార్టీలో చేరారు. బుధవారం జరిగిన ఓ కార్యక్రమంలో ఆయన హస్తం కండువా కప్పుకున్నారు. అంతేకాకుండా తన ‘అఖిల భారత నాదలం మక్కల్ కచ్చి’ పార్టీని కూడా కాంగ్రెస్ లో విలీనం చేశారు. ఇది కాంగ్రెస్ కు పెద్దగా లాభపడకపోయినా.., కనీసం సరైన నేతలు కూడా లేని ప్రస్తుత సమయంలో కార్తిక్ చేరిక కొంతమంది కార్యకర్తలనైనా తీసుకొచ్చే అవకాశముంది.

సీనియర్ నటుడుగా గుర్తింపు పొందిన 54సం.ల కార్తిక్ 2006 సంవత్సరంలో రాజకీయాల్లోకి ప్రవేశించారు. మొదటగా ఆల్ ఇండియా ఫార్వర్డ్ బ్లాక్ పార్టీలో చేరారు. ఆ పార్టీ తమిళనాడు రాష్ర్ట విభాగ కార్యదర్శిగా పనిచేశారు. ఆ తర్వాత 2009 ఎన్నికలకు ముందుగా ‘ఆల్ ఇండియా నాదలం మక్కల్ కచ్చి’ పార్టి పెట్టి ఎన్నికల్లో పోటి చేశారు. అయితే పెద్దగా ప్రభావం చూపలేదు. ఇక 2011 లో తమిళనాడు అసెంబ్లీ ఎన్నికల్లో కూడా ఇబ్బందులు ఎదుర్కుంది. ఈ సమయంలో అన్నాడాఎంకేతో పొత్తు పెట్టుకోవాలనుకన్నప్పటికీ... పలు పరిణామాలతో ఇది కుదర్లేదు.

చివరకు ఆయన పార్టీని కాంగ్రెస్ లో విలీనం చేశారు. అయితే కేంద్రంలో, రాష్ర్టంలో అధికారంలో లేని పార్టీలో చేరటం విషయంలో కార్తిక్ వ్యూహం ఏమిటో తెలియటం లేదు. తెలుగు, తమిళ భాషల్లో గతంలో ఈయన అనేక సినిమాలు చేశారు. వీటిలో ‘అభినందన’, ‘సీతాకోకచిలుక’, ‘అన్వేషణ’ తదితర సినిమాలు సూపర్ హిట్ అయ్యాయి. ఇప్పటికి కార్తిక్ సినిమాలు వస్తే చూసే తెలుగు ప్రేక్షకులు చాలామంది ఉన్నారు.

 

కార్తిక్