జమ్మూ-శ్రీనగర్ జాతీయ రహదారి పునరుద్దరణ

Posted: 09/16/2014 11:37 AM IST

వరదలతో అతలాకుతలమైన జమ్మూకాశ్మీర్ లో ఇప్పుడిప్పడే కుదుట పడుతోంది. గత పది రోజుల పాటు వరుణుడి ప్రళయ తాపానికి జలవిలయం మధ్య అక్కడి ప్రజలు విలవిలలాడారు. విద్యుత్, సమాచార సంబంధాలు తెగిపోడంతో కప్పకూలిన  సమాచార వ్యవస్థ పునరుద్దరణ పనులు నిర్వహిస్తున్నారు. దారులు కోతకు గురవ్వడంతో గత పది రోజులుగా రోడ్డు రవాణా ఎక్కడికక్కడ నిలిచిపోయింది. వరదలు తగ్గుముఖం పట్టడంతో ప్రజలు రోడ్లపైకి వస్తున్నారు. పల్లెలు పట్టణాలు, నగరాలు జల సమాధి నుంచి ఇప్పుడిప్పడే సాధారణ పరిస్థుతులకు చేరుకుంటున్నాయి. అనేక చోట్ల పునరావాస కేంద్రాల్లో వున్న ప్రజలు వారి స్వగృహాలకు పయనమవుతున్నారు.

జమ్మూ-శ్రీనగర్ జాతీయ రహదారిని ఎట్టకేలకు అధికారులు ఇవాళ తెరిచారు. వర్షాలతో రహదారిపై విరిగిపడిన కొండచరియలను అధికారులు తొలగించారు. వరదలతో ఈ రహదారి అక్కడక్కడా కోతలకు గురైందని, డ్రైవర్లు జాగ్రత్తగా వ్యవహరించాలని హెచ్చరించారు. అక్కడక్కడా కొండచరియలు విరిగిపడడంతో రొడ్డు కుంగిపోగా వాటికి అధికారుల మరమ్మతులు చేస్తున్నారు. పర్వత ప్రాంతానికి ముఖ్యమైన రహదారి తెరవడంతో వరద ప్రభావిత ప్రాంతాలకు సరుకులను రవాణా చేయవచ్చని దీంతో గత పది రోజులుగా పూట తిని, తినక పస్తులు వున్న ప్రజలకు ఆహార పదార్థలు అందుతాయని అధికారులు చెబుతున్నారు. పది రోజుల తరువాత రహదారి తెరవడంతో.. ఒక్కసారిగా రోడ్డుపై ట్రాపిక్ కు తీవ్ర అంతరాయం ఏర్పడింది. బనిలాల్, రాంబన్, బటోటే, కుడ్, పట్నీటాప్, చినాని, ఉదంపూర్, జమ్మూ తదితర ప్రాంతాల్లో రోడ్డుపై వందల సంఖ్యలో వాహనాలు నిలిచిపోయాయి.

జి.మనోహర్