నందిగామ ఉప ఎన్నికలో టీడీపీ విజయం

Posted: 09/16/2014 11:21 AM IST

అనుకున్నదే జరిగింది. అధికార పక్షానికే ప్రజలు పగ్గాలు అప్పగించారు. ఏపీలో జరిగిన ఉప ఎన్నికలో నందిగామ అసెంబ్లీ స్థానం నుంచి టీడీపీ అభ్యర్ధి తంగిరాల సౌమ్య గెలుపొందారు. సమీప అభ్యర్ధి, కాంగ్రెస్ పార్టీ నేత బోడపాటి బాబురావుపై 74,827 ఓట్ల మెజార్టీతో గెలుపొందారు. దీంతో టీడీపీ శ్రేణులు సంబరాలు చేసుకుంటున్నాయి. సార్వత్రిక ఎన్నికల్లో టీడీపీ నుంచి పోటి చేసిన తంగిరాల ప్రభాకర రావు ఎమ్మెల్యేగా గెలిచారు. అయతే ప్రమాణ స్వీకారం చేయకముందే ఆయన మరణించటంతో ఉప ఎన్నిక అనివార్యమైంది.

ఉప ఎన్నికలో వైసీపీ అభ్యర్దిని నిలబెట్టలేదు. ప్రభాకర్ రావును గౌరవిస్తూ., ఆయన కుటుంబ సభ్యులకే అవకాశం ఇస్తామని పార్టీ ప్రకటించింది. అయితే కాంగ్రెస్ మాత్రం అదృష్టం పరిక్షించుకోవటానికి అభ్యర్ధిని పోటికి పెట్టింది. అసలే విభజన కోపంతో ఉన్న ప్రజలు సానుభూతి ఓట్లను కూడా కలిపి వేయటంతో సౌమ్య గెలిచింది. అయితే ఈ సారి కాంగ్రెస్ పరిస్థితి కాస్త మెరుగయింది. బాబురావు డిపాజిట్ దక్కించుకుని పరువు కాపాడుకున్నారు. మొత్తం పోలయిన ఓట్లలో సౌమ్యకు 99,748 ఓట్లు రాగా, బాబురావుకు 24,921 ఓట్లు వచ్చాయి. ఇక పోటిలో ఉన్న ఒక స్వతంత్ర్య అభ్యర్ధికి 650 ఓట్లు వచ్చాయి. తండ్రిపై నమ్మకం ఉంచి తనను గెలిపించినందుకు నియోజకవర్గ ప్రజలకు సౌమ్య ధన్యావాదాలు తెలిపారు.

కార్తిక్