దెయ్యం పట్టిందని కన్నకూతురినే హతమార్చిన కిరాతకుడు!

Posted: 09/06/2014 11:11 AM IST

(Image source from: father killed his daughter and bruthally beater her wife)

రానురాను మన దేశంలో మానవత్వం మంటగలిసిపోతుందనడానికి ఇదొక మంచి ఉదాహరణ! తన కన్నకూతురు అని చూడకుండా దెయ్యం పట్టిందనే సాకుతో దారుణంగా హతమార్చాడు. కేవలం తన కూతురినే కాదు.. అగ్నిసాక్షిగా పెళ్లాడిన భార్యను కూడా హతమార్చేందుకు ప్రయత్నించాడు. అయితే చుట్టుపక్కల వున్న స్థానికులు స్పిందించడంతో ఆమె బతికిబయటపడింది.

విజయనగరంలోని ఎస్ కోట ప్రాంతంలో ఈ దారుణ సంఘటన చోటుచేసుకుంది. కాలక్రమంలో భార్య, కూతుళ్ల ప్రవర్తనలో చాలా మార్పు వచ్చిందని.. ఈ నేపథ్యంలోనే వారిద్దరికీ దెయ్యం పట్టిందని భావించిన అతను... ఇద్దరిని ఒక గదిలో వేసి దారుణంగా కొట్టాడు. ఇలా కొన్ని నిముషాలతరబడి కొడుతున్న నేపథ్యంలో కూతురు అక్కడికక్కడే చనిపోగా... భార్య తీవ్రంగా గాయపడింది. అయితే చాలాసేపటివరకు అరుపులు వస్తున్న కారణంగా స్థానికులు ఏం జరుగుతుందోనని చూడగా.. అతను తన భార్యను కొడుతున్నాడని గమనించివాళ్లు.. వెంటనే స్పందించారు. తీవ్రంగా గాయపడిన సదరు మహిళను ఎస్ కోట ప్రభుత్వ ఆసుపత్రికి తరలించి.. పోలీసులకు సమాచారం అందించారు.

సమాచారాన్ని సేకరించిన అనంతరం రంగంలోకి దిగిన పోలీసులు.. ఆసుపత్రిలో చికిత్స పొందుతున్న మహిళ వాంగ్మూలాన్ని తీసుకున్నారు. ‘‘దెయ్యం పట్టిందనే కారణంతోనే తమపై భర్త చాలా దారుణంగా దాడి చేశాడు’’ అని పోలీసులకు తెలిపింది. దాంతో పోలీసులు నిందితుడిని అదుపులోకి తీసుకుని, కేసు నమోదు చేశారు. అయితే ఈ ఘాతుకం వెనుక ఏదైనా బలమైన కారణం వుండవచ్చుననే కోణంలో పోలీసులు దర్యాప్తు ప్రారంభించారు.