తెల్లవారుజామునే జీవితాలు తెల్లారాయి

Posted: 09/06/2014 08:08 AM IST

Chemical van accident in krishna district

శనివారం తెల్లవారుజామున ఆంధ్రప్రదేశ్ లో ఘోర రోడ్డు ప్రమాదం జరిగింది. కృష్ణా జిల్లా బాపులపాడు మండలంలోని వీరవరం 16వ నెంబర్ జాతీయ రహదారిపై దుర్ఘటన జరిగింది. కెమికల్ టిన్నులతో హైదరాబాద్ నుంచి తణకు వెళ్తున్న మినీ వ్యాను వీరవల్లి సమీపంలో పెట్రోల్ బంకు దగ్గర ఉన్న లారీని ఢీ:కొట్టింది. ప్రమాద తీవ్రతకు వ్యానులోని కెమికల్ టిన్నుల్లో ఒకటి పగిలిపోయింది. రసాయనం బయటకు లీకై ఘాటుతో పాటు దట్టంగా పొగలు వ్యాపించాయి.

పొగ తీవ్రతకు వ్యానులో ఉన్న నలుగురూ చనిపోయారు. ఒకరిని హాస్పిటల్ కు తరలిస్తుండగా మార్గమద్యలో ప్రాణాలు వదిలారు. ఈ ప్రమాదంలో గాయపడ్డ మిగతావారిని ఆస్పత్రులకు తరలించి చికిత్స అందిస్తున్నారు. చనిపోయినవారంతా పశ్చిమగోదావరి జిల్లాకు చెందినవారుగా గుర్తించారు. ఘటనపై పోలిసులు కేసు నమోదు చేసుకున్నారు. డ్రైవర్ చూసుకోకపోటం వల్లే ఈ ప్రమాదం జరిగినట్లు ప్రాధమికంగా అంచనాకు వచ్చారు. తెల్లవారుతుండగానే ఐదుగురి జీవితాలు తెల్లవారిపోవటంతో వారి కుటుంబంలో విషాద చాయలు అలముకున్నాయి.

అనంత ప్రమాదంలో నలుగురు

ఇక అనంతపురం జిల్లాలో జరిగిన ఘోర రోడ్డు ప్రమాదం నలుగుర్ని బలితీసుకుంది. హైదరాబాద్ నుంచి బెంగళూరు వెళ్తున్న వోల్వో బస్సు చిలమత్తూరు మండలం కొడికొండ చెక్ పోస్టు దగ్గర లారీని ఢీ: కొట్టింది. ఈ ప్రమాదంలో నలుగురుప్రాణాలు కోల్పోయారు. మరో ఆరుగురికి తీవ్ర గాయాలు అయ్యాయి. ప్రమాదానికి గురైన బస్సు ఒమర్ ట్రావెల్స్ కు చెందినదిగా స్థానిక పోలిసులు తెలిపారు. హైదరాబాద్ లోని అఫ్జల్ గంజ్ లో ఒమర్ ట్రావెల్స్ కార్యాలయం ఉంది.

కార్తిక్