సీటు రద్దా.., అయితే లక్ష కట్టు

Posted: 08/30/2014 12:29 PM IST

One lakh fine for cancellation of medical seat in telugu states

వివాదాలకు కేంద్రబిందువైన ఎంసెట్ కౌన్సిలింగ్ మరో గందరగోళానికి తెరతీసింది. సీట్ల రద్దుపై ఎన్టీఆర్ హెల్త్ వర్సిటీ వివాదాస్పద నిర్ణయం తీసుకుంది. తెలంగాణ, ఏపీ రాష్ర్టాల్లో మెడికల్ కౌన్సిలింగ్ ప్రారంభమైంది. రెండు రాష్ర్టాల్లో ఎంపిక చేసిన కేంద్రాల్లో దృవపత్రాల పరిశీలన జరుగుతోంది. అయితే ఈ సారి కౌన్సిలింగ్ లో యునివర్సిటీ ఒక కొత్త నిబంధన తీసుకువచ్చింది. విద్యార్థులు ఒకసారి అడ్మిషన్ తీసుకున్న తర్వాత సీటు రద్దు చేసుకుంటే లక్ష రూపాయలు ఫైన్ చెల్లించాలని స్పష్టం చేసింది. ఈ నిబంధన రెండు రాష్ర్టాల్లోనూ అమలు చేస్తున్నట్లు ఎన్టీఆర్ హెల్త్ యునివర్సిటీ వీసీ రవిరాజు తెలిపారు.

విద్యార్థులు కాలేజీల్లో జాయిన్ అయి, ఆ తర్వాత సీట్లు క్యాన్సిల్ చేసుకుంటుండటంతో తమకు తిరిగి సీట్ల భర్తీ ఇబ్బందిగా మారుతుందని అధికారులు అంటున్నారు. మెడిసిన్ లో చేరిన విద్యార్థులు ఇతర కోర్సుల్లో కూడా సీట్లు వస్తే అందులో చేరేందుకు సీట్లు రద్దు చేసుకుంటున్నారు. అంతేకాకుండా వివిధ కారణాలతో జాయిన్ అయి తిరిగి వెళ్లిపోతున్నారు. ఇలా కౌన్సిలింగ్ పూర్తయిన తర్వాత సీటు క్యాన్సిల్ చేసుకుంటే.., ఆ సీటును మరొకరికి ఇవ్వలేమని., అందువల్ల ఐదు సంవత్సరాల పాటు ఆ సీటు వృదాగా పోతుందని చెప్తున్నారు. ఇలా జరగకుండా చూసేందుకే సీటు రద్దు చేసుకుంటే లక్ష రూపాయల నిబంధన తీసుకువచ్చామన్నారు.

అయితే ఈ నిబందనపై విద్యార్థుల తల్లితండ్రులు అసంతృప్తి వ్యక్తం చేస్తున్నారు. విద్యార్థులకు చదువుకునే స్వేచ్చ ఇవ్వకుండా వర్సిటీలు నిర్ణయాలు తీసుకుంటున్నాయని మండిపడుతున్నారు. ఉన్నత కాలేజీలు, యునివర్సిటీల్లో సీట్లు వస్తే కూడా వద్దనుకుని ఇక్కడే ఉండమంటే ఎలా అని ప్రశ్నిస్తున్నారు. అయితే మెడిసిన్ పై మక్కువ ఉన్న విద్యార్థులకు మేలు జరగాలనే ఈ నిర్ణయం తీసుకున్నామని అధికారులు సమర్ధించుకుంటున్నారు. రెండు రాష్ర్టాల్లో ముందుగా చేరిన 200మంది విద్యార్థులకు ఉచితంగా పుస్తకాలు అందిస్తామని తెలంగాణ డైరెక్టర్ ఆఫ్ మెడికల్ ఎడ్యుకేషన్ బుట్టా శ్రీనివాస్ వెల్లడించారు.

కార్తిక్