పోలీసులకు కునుకు లేకుండా చేస్తున్న ముజాహిదీన్!

Posted: 07/29/2014 09:47 AM IST

ఇండియన్ ముజాహిదీన్ ఉగ్రవాదులు పోలీసులకు కునుకు లేకుండా చెయ్యటం కోసమే అన్నట్లు ముంబై పోలీస్ కమిషనర్ కి ముందస్తు హెచ్చరికలను లేఖ ద్వారా చేసారు.  ఆ లేఖ ప్రకారం ఇండియన్ ముజాహిదీన్ దేశంలో పలు ముఖ్య ప్రాంతాల్లోను, మెట్రో నగరాల్లోను బాంబులతో దాడిచెయ్యబోతున్నారు.  

సామాన్యంగా దొంగదెబ్బ తీసే ఉగ్రవాదులు ఇలా ముందుగానే హెచ్చరికలు ఎందుకు చేస్తున్నారూ అంటే వాళ్ళకు పోలీసులకు విశ్రాంతి లేకుండా చెయ్యాలనే ఉద్దేశ్యం కావొచ్చు లేదా ఇలా హెచ్చరికలు చేసి చేసి చివరకు అప్రమత్తమంతా పల్చబడిపోయిన సమయంలో వేటు వెయ్యటానికీ కావొచ్చు.  ఆకతాయిలు రాసిన లేఖా కావొచ్చు, లేదా నిజంగానే చెప్పింది చేసి, లేదా చేసేది చెప్పామని హీరోలమనిపించుకునే ప్రయత్నమూ కావొచ్చు.  కానీ ఏ లేఖనూ ఏ ఫోన్ కాల్ నూ విస్మరించగూడదు కాబట్టి పోలీసులు ఈ లేఖను సీరియస్ గానే తీసుకుంటున్నారు.  ఫలితంగా అన్ని రాష్ట్రాలకూ రెడ్ అలెర్ట్ పంపించబడింది. 

శంషాబాద్ లో అప్రమత్తం

ఆంధ్రప్రదేశ్ లో సైబరాబాద్ పోలీస్ కమిషనర్ సి వి ఆనంద్ శంషాబాద్ విమానాశ్రయంలో లో భద్రతా ఏర్పాట్లను ముమ్మరం చేసారు.  అదనపు బలగాలతో ప్రవేశ ద్వారాలను, సందర్శకులు ఎక్కువగా తిరిగే ప్రాంతాలలోను భద్రతా ఏర్పాట్లను పటిష్టంగా చేసి, అనుమానస్పద వ్యక్తుల కదలికలను కనిపెట్టేందుకు పోలీసులు, విమానాశ్రయం భద్రతా సిబ్బంది సంసిద్ధమయ్యారు.  

-శ్రీజ