టి-ఉద్యోగులకు నేడు రెండో సారి జీతాలు ?

Posted: 07/25/2014 09:11 AM IST

T employees salaries on 25th july in ramzan festival

రాష్ట్ర విభజన ఏర్పాటు జరిగిన తరువాత.. తెలంగాణ ఉద్యోగులు .. రెండో సారీ జీతాలు ఈరోజు తీసుకుంటున్నారు. ముస్లింలకు పవిత్రమైన పండుగ రంజాన్ సందర్భంగా రాష్ట్ర ప్రభుత్వం ఉద్యోగులందరికీ శుక్రవారం 25న వేతనాలు చెల్లించాలని నిర్ణయించింది. ఈ మేరకు ఆర్థికశాఖ ముఖ్యకార్యదర్శి వీ నాగిరెడ్డి గురువారం ఉత్తర్వులు (జీవో నం247) జారీచేశారు.

దీంతో జూలై నెలకు సంబంధించిన జీతాలు ఆరు రోజుల ముందే ఉద్యోగులకు అందనున్నాయి. తెలంగాణలోని హిందూ ముస్లిం సోదరభావం గంగా జమునా తెహజీబ్ లాంటి సంస్కృతికి నిదర్శనమని ముఖ్యమంత్రి కే చంద్రశేఖర్‌రావు పలుమార్లు కొనియాడిన సంగతి తెలిసిందే.

ఆ స్ఫూర్తిని చాటుతూ రంజాన్ సందర్భంగా రాష్ట్ర ఉద్యోగులకు ముందస్తుగా జీతాల చెల్లించాలని ఆయన సూచించారు. ముందస్తు జీతాల చెల్లింపు కోసం తెలంగాణ గెజిటెడ్ అధికారుల సంఘం చైర్మన్, ఎమ్మెల్యే వీ శ్రీనివాస్‌గౌడ్, తెలంగాణ పీఆర్టీయూ, తెలంగాణ మైనారిటీ ఉద్యోగుల సంక్షేమ సంఘాలు చేసిన విజ్ఞప్తికి ఆయన అంగీకారం తెలిపారు.