రంగరాజన్ రాకతో రుణ మాఫీల మీద కసరత్తు

Posted: 07/14/2014 10:12 AM IST

విదేశపర్యటనలో ఉన్న రిజర్వ్ బ్యాంక్ గవర్నర్ రంగరాజన్ సోమవారం వస్తూనే ఆంధ్రప్రదేశ్ లో ముఖ్యమంత్రి చంద్రబాబు నాయుడు రైతులకు హామీ ఇచ్చిన రుణమాఫీల మీద స్పష్టతవచ్చే అవకాశం ఉంది.

బ్యాంక్ లు, రిజర్వ్ బ్యాంక్ ప్రభుత్వం ఇవ్వదలచుకున్న రైతుల రుణమాఫీల మీద అభ్యంతరాలు తెల్పటంతో చంద్రబాబు నాయుడు ఢిల్లీలో దాని మీద కాస్త వత్తిడి పెంచి ప్రత్యామ్నాయాలకు చూసారు.  ఋణమాఫీ కంటే ఋణాలను రిషెడ్యూల్ చేసే విధానం ఈ సందర్భంలో బాగా సరిపోతుందని తేలింది.  దానితో రిషెడ్యూల్ చెయ్యవలసిందిగా రిజర్వ్ బ్యాంక్ ని కోరటం జరిగింది.  దీనివలన ప్రభుత్వానికి తేడా ఏమీ రాదు సరికదా పని జరిగిపోతుంది.  

రిషెడ్యూల్ జరిగిపోగానే దీనిమీద రాష్ట్ర ప్రభుత్వం నియమించిన కోటయ్య కమిటీ తమవంతు కసరత్తు చేసి నివేదికను సమర్పించనుంది.  ముందుగా హామీ ఇచ్చిన ప్రకారం గరిష్ట పరిమితిగా లక్షన్నర వరకు రుణ మాఫీ జరిగేలా చూస్తూ అంతిమ నివేదికనివ్వనుంది.  ఒకవేళ తీసుకున్న రుణం లక్షన్నరకు ఎక్కువుంటే వారికి కూడా లక్షన్నర వరకు ప్రయోజనం కలిగేలా లెక్కలు తయారు చేస్తున్నారు.  

ప్రభుత్వ భూములు, ఎర్రచందనం, ఎక్సైజ్ ఆదాయం లాంటి హామీలను చూపిస్తూ రాష్ట్ర ప్రభుత్వం బ్యాంక్ ల నుండి రుణం తీసుకుని దాన్ని రైతు ఋణమాఫీలో చెల్లింపులు చేస్తారు.  ఇందులో కూడా తొలివిడతలో ఎంత, ఆ తర్వాత ఎంత సొమ్మును బ్యాంక్ లకు రైతుల తరఫున చెల్లింపులను చెయ్యాలా అన్న షెడ్యూల్ ని కూడా కోటయ్య కమిటీ తయారుచేస్తుంది.  

-శ్రీజ