దెబ్బకు రోడ్డునపడ్డ తెలుగు నిరుద్యోగులు.....

Posted: 07/12/2014 05:37 PM IST

నిరుద్యోగుల జీవితాలతో ఆటలాడే సంస్థలు పుట్టుకొస్తున్నాయి. ఉద్యోగాల పేరిట నిరుద్యోగులను భారీ ఎత్తున మోసం చేస్తున్నారు. మీరు పది చదవితే చాలు .. నెలకు వేల రూపాయలు సంపాదించే అవకాశం అంటూ ఆశ చూపించి.. చివరకు ఘోరంగా మోసం చేస్తున్నారు.

గ్లేజ్ ట్రేడింగ్ ఇండియా సంస్థ. పెద్దమొత్తంలో నిరుద్యోగుల నుంచి సొమ్ము రాబట్టుకుంది. రాష్ట్రం కాని రాష్ట్రానికి పంపి తెలుగువారిని ఇబ్బందులకు గురిచేసింది. నిరుద్యోగులను నట్టేట ముంచుతున్న గ్లేజ్ ట్రేడింగ్ ఇండియా ప్రైవేట్ లిమిటెడ్ గుట్టు బయటపడింది. పదవ తరగతి చదివి పదివేలు చెల్లిస్తే.. నెలనెలా యాభైవేల రూపాయల సంపాదన అంటూ నిరుద్యోగులను మోసగిస్తున్న సదరు సంస్థ భాగోతం బయటపడటంతో.. అందరు షాక్ తిన్నారు.

అరకొర చదువులకు పెద్దమొత్తంలో నెల సంపాదన అనుకుంటూ.. ఎంతోమంది సంస్థ కార్యాలయానికి క్యూ కట్టారు. పదివేల చొప్పున ఏకంగా పదివేలమంది వరకు డబ్బులు సంస్థకు ముట్టజెప్పారు. సంస్థ కల్లిబొల్లి మాటలు విని.. వేలకు వేలు ముట్టజెప్పి జార్ఖండ్ రాష్ట్రానికి ఉద్యోగానికి వెళ్లిన తెలుగువారు ఇబ్బందులకు గురయ్యారు. భాష రాక.. ఏం చేయాలో తెలియక నానాతిప్పలు పడినట్లు తెలుస్తోంది.

గ్లేజ్ ట్రెడింగ్ ఇండియా సంస్థ నుండి మోసపోయిన బాధితుల్లో తెలంగాణ, ఆంధ్రప్రదేశ్, కర్నాటక రాష్ట్రాలకు చెందినవారు ఉన్నారు. పదివేలు కడితే ఉద్యోగం సొంతమన్న నిర్వాహకులు.. తర్వాత మాట మార్చారు. మీతో పాటు నలుగురిని జాయిన్ చేస్తే తప్ప మీకు జాబ్ లేదంటూ చైన్ సిస్టమ్ కథలు చెప్పారు. దీంతో మోసపోయామని గ్రహించిన బాధితులు సంస్థ యాజమాన్యాన్ని ప్రశ్నించినా లాభం లేకపోయింది. సొంత రాష్ట్రాలకు వచ్చేందుకు డబ్బులు లేక జార్ఖండ్ లోనే రైల్వే స్టేషన్లు, ఫుట్ పాత్ లపై తలదాచుకునే పరిస్థితి దాపురించింది.