ఢిల్లీ పాలిటిక్స్ లో జగన్

Posted: 11/15/2013 12:33 PM IST

రాష్ట్రాన్ని సమైక్యంగా ఉంచాలని చేస్తున్న నినాదాన్ని జాతీయస్థాయిలో తీసుకెళ్లేందుకు వైఎస్సార్ కాంగ్రెస్ పార్టీ వ్యూహాలు రచిస్తోంది. అందులో భాగంగా ఈరోజు సాయంత్రం ఆ పార్టీ అధ్యక్షుడు జగన్ ఢిల్లీకి వెళ్లనున్నారు. పార్లమెంట్ లో ప్రాతినిథ్యం వహిస్తున్న పార్టీల నేతలతో ఆయన భేటీ కానున్నారు. కేవలం ఓట్లు, సీట్ల కోసమే కాంగ్రెస్ రాష్ట్ర విభజన చేసిందని ఆయన నేతలకు వివరించనున్నారు. దేశంలోని అనేక రాష్ట్రాలను ముక్కలు చేసే అవకాశం ఉందని, ఆంధ్రప్రదేశ్ రాష్ట్రాన్ని సమైక్యంగా ఉంచాలని నేతలను జగన్ కోరనున్నారు.

 

ఇటీవలే తాను దేశ వ్యాప్త పర్యటన చేస్తానని జగన్ పేర్కొన్న సంగతి తెలిసిందే. దేశ వ్యాప్తంగా పర్యటించేందుకు అనుమతినివ్వాలని కోర్టును జగన్ కోరిన విషయం తెలిసిందే. మూడు రోజుల పాటు కోర్టుకు సెలవు కావడంతో ఆయన ఢిల్లీ పర్యటన కు పూనుకున్నట్లు సమాచారం. 16 నుండి 18వ తేదీ వరకు ఢిల్లీలోనే ఉండే విధంగా ప్లాన్ చేసుకున్నట్లు తెలుస్తోంది. 18వ తేదీ నాటికి కోర్టు అనుమతినిస్తే తదుపరి షెడ్యూల్ ను ఖరారు చేసుకోనున్నారు.

 

ఢిల్లీ పర్యటనలో కాంగ్రెస్ పార్టీకి చెందిన నేతలను కలుస్తారా లేదా ? అన్నది తెలియడం లేదు. దిగ్విజయ్ సింగ్ లేదా జీఓఎం సభ్యులతో జగన్ భేటీ అయ్యే అవకాశం ఉందని సమాచారం. సోనియాగాంధీతో జగన్ భేటీ అవుతారని ప్రచారం జరుగుతోంది. సోనియాగాంధీ నిర్ణయాన్ని వ్యతిరేకిస్తూ ఆమెను జగన్ ఎలా కలుస్తారని వైసీపీ నేతలు పేర్కొంటున్నారు. రాష్ట్రాన్ని సమైక్యంగా ఉంచాలని జగన్ చేస్తున్న ఈ ఢిల్లీ పర్యటనకు జాతీయ నేతలు మద్దతు తెలుపుతారా లేదా వేచి చూడాల్సిందే.