రాష్ట్ర వి(భజన)

Posted: 08/08/2013 10:08 AM IST

రాష్ట్ర విభజన ప్రకటన రాగానే కొన్నాళ్ళుగా నిద్రాణంగా ఉన్న తెలంగాణా నాయకులు కొందరు బాహాటంగా ముందుకొచ్చారు.  అందులో మాజీ పిసిసి అధ్యక్షుడు డి. శ్రీనివాస్ ఒకరు.  ఈ మధ్యకాలంలో ఢిల్లీలో సోనియా గాంధీ, ఇతర ముఖ్యనాయకులతో సమావేశమైన డిఎస్ భుజస్కంధాల మీద అధిష్టానం మరో బాధ్యతను అప్పగించినట్లుగా అర్థమౌతోంది. 

నిజామాబాద్ సందర్శించిన డిఎస్ కి అక్కడి సిటీ కాంగ్రెస్ కమిటీ బ్రహ్మరథం పట్టింది.  ర్యాలీతో ఘనంగా ఆహ్వనించిన మీదట డిఎస్ తన ప్రసంగంలో సోనియా గాంధీ మీద ప్రశంసలకే ఎక్కువ ప్రాముఖ్యతనిచ్చారు.  తెలంగాణా విజయం సోనియమ్మ ఖాతాలోనే జమ కట్టాలన్నారాయన.  అయితే బలిదానాలను చేసిన అమరవీరులకు కూడా ఆయన నివాళులర్పించారు కానీ రాష్ట్ర విభజన లో సోనియాదే ప్రముఖమైన పాత్రంటూ ఆమెను శ్లాఘించారు.

అంతకుముందు నిజామాబాద్ లోకి ప్రవేశించే ముందు ఆయన సాయిబాబా ఆలయంలో ప్రార్ధన చేసి ఆ తర్వాత ఇందిరా గాంధీ, రాజీవ్ గాంధీ విగ్రహాలకు పూలమాలలు వేసి నివాళులర్పించారు.

తెలంగాణా నిర్ణయం తీసుకోవటంలో ఎన్నో అడ్డంకులు వచ్చాయని, వాటనన్నిటినీ అధిగమిస్తూ ఆమె ధైర్యంగా ప్రత్యేక తెలంగాణా నిర్ణయాన్ని ప్రకటించారని చెప్పిన డిఎస్, ఆ నిర్ణయాన్ని ప్రకటించిన మీదట ఇతర క్షేత్రాలనుంచి ఒత్తిడి వస్తున్నా, ఆమె ఎలాగైనా ఇచ్చిన మాట నిలబెట్టుకుంటారని ఆయన తన విశ్వాసాన్ని ప్రకటించారు. 

డిఎస్ తన ప్రసంగంలో ఇరు క్షేత్రాలవారినీ సంయమనాన్ని పాటించవలసిందిగా కోరుతూ, రెచ్చగొట్టే వ్యాఖ్యలను ఎవరినీ చెయ్యవద్దని కోరారు.

ఇక తెలంగాణా రాష్ట్రం ఏర్పడటం ఖాయమే కాబట్టి భవిష్యత్ కార్యాచరణలో తెలంగాణాలోని సహజ వనరుల సంపద ఎంతో మేలుచేస్తుందని, అభివృద్ధికి లోటుండదని డిఎస్ తెలంగాణా ప్రాంత ప్రజలకు హామీ ఇచ్చారు.

-శ్రీజ