రాష్ట్రమంత్రుల మీద గురుతర బాధ్యత

Posted: 08/01/2013 01:19 PM IST

తెలంగాణా రాష్ట్ర ఏర్పాటుకు కాంగ్రెస్ పార్టీ నిర్ణయం తీసుకుని చేసిన ప్రకటన దృష్ట్యా సీమాంధ్రలో చెలరేగిన సమైక్య ఉద్యమ జ్వాల ఊహించినదే అయినా మన నాయకులు ముందస్తు హెచ్చరికలు చేసినా, కాంగ్రెస్ అధినేత్రి సోనియా గాంధీ మాత్రం ఆత్మస్థైర్యంతో గట్టి నిర్ణయం తీసుకుని ధైర్యంగా ప్రకటన చేసారు.  రాష్ట్ర విభజన విషయంలో సోనియా తెలంగాణా ప్రాంత ప్రజల సద్భావనను గెలుచుకున్నారు కానీ సీమాంధ్ర ప్రాంతం నుంచి మరీ ఇంతగా వ్యతిరేకత వస్తుందని ఊహించనట్టున్నారు. 

మరో విషయమేమిటంటే సమైక్యాంధ్ర కార్యాచరచరణ సమితితో పాటు రాజకీయ పార్టీ వైయస్ ఆర్ కాంగ్రెస్ పార్టీ కూడా నిరసనలకు మద్దతునివ్వటం ఒకింత గుబులు కలిగించే అంశమైనట్టుగా కనిపిస్తోంది. 

అందుకే సీమాంధ్ర నాయకుల భుజస్కంధాల మీద మరో బాధ్యతను కూడా పెట్టినట్టుగా సమాచారం.  అదేమిటంటే సీమాంధ్రవాసులకు రాష్ట్ర విభజన మంచి చర్యేనని నచ్చజెప్పటం. 

విభజన వలన సీమాంధ్రకు మంచి జరుగుతుందని, అభివృద్ధి పథంలో పోవటానికి అవకాశం ఉందని, వారు భయపడుతున్నట్లుగా వారికి ఆర్థికంగా నష్టమేమీ జరగదని, బోలెడంత సాయం అందుతుందని వారికి అర్థమయ్యే విధంగా చెప్పి ఉద్యమాన్ని మొదట్లోనే తుంచివేసే విధంగా తమ ప్రాంత ప్రజలను ప్రభావితం చేయాలని సోనియా గాంధీ సీమాంధ్ర నేతలకు ఆదేశాలిచ్చినట్టుగా విశ్వసనీయ వర్గాల నుండి అందిన సమాచారం. 

దానికనుగుణంగా ఈ రోజు ముఖ్యమంత్రి కిరణ్ కుమార్ రెడ్డి సీమాంధ్ర పరిస్థితులను సమీకరిస్తున్నారు.  కార్యదర్శి, డిజిపిలతో సమావేశమైన కిరణ్ కుమార్ పరిస్థితులను చాకచక్యంగా నియంత్రించాలని, బాష్పవాయువులు, రబ్బర్ బుల్లెట్లను కూడా ఉపయోగించకుండానే సాధ్యమైనంత వరకు పరిస్థితిని అదుపులోకి తేవాలని సూచించారు.

-శ్రీజ