పెళ్ళికాకపోయినా అవన్నీ తప్పవు

Posted: 07/17/2013 03:23 PM IST

మొన్నామధ్య తమిళనాడు హైకోర్టు లైంగిక సంబంధమే అసలు వివాహమని, అందరి ముందు చేసుకునే వివాహ వేడుక కేవలం తంతు మాత్రమేనని సంచలన వ్యాఖ్యలను చేసింది.  దాని మీద ఎన్నో వ్యాఖ్యానాలను ఎందరో చేసారు.  కేరళ హైకోర్టు మరో అడుగు ముందుకేసి, గృహ హింస చట్టం కూడా వాళ్ళకి వర్తిస్తుందని తీర్పునిచ్చింది. 

ఒకే కప్పుకింద కాపురం చేస్తూ పిల్లలను కూడా కన్న తర్వాత మాకు పెళ్ళి కాలేదు అంటే కుదరదని తమిళనాడు హైకోర్టు ఇచ్చిన తీర్పు ఆ మహిళా బాధితురాలికి న్యాయం చేయటానికే అయినా అప్పటి కోర్టు వ్యాఖ్యలను వక్రీకరిస్తూ, అయితే నాకు పెళ్ళయినట్టే నేను కన్యను కానుగా అని ఒకళ్ళు, అయితే నాకు ఎప్పుడో పెళ్ళయిపోయిందని మరోకళ్ళు ఇలా రకరకాలుగా ట్వీట్లు చేసారు. 

లైంగిక సంబంధంతో పెళ్ళి జరిగిపోయనట్లే అయినా వాళ్ళు కావాలంటే వాళ్ళ వివాహాన్ని రిజిస్టర్ చేసుకోవచ్చని, కావలంటే విడాకులు కూడా చట్ట బద్ధంగా తీసుకోవచ్చని కోర్టు తెలియజేసింది.  గృహ హింస చట్టం కూడా వాళ్ళకి వర్తిస్తుందని కేరళ హైకోర్టు తెలియజేయటంతో యువత కాస్త ఆలోచనల్లో పడక మానదు.  పెళ్ళి కాకపోయినా అన్నీ కావాలనుకునే యువతకు పెళ్ళి కాకపోయినా అన్ని బాధ్యతలను తీసుకోవలసివస్తుందనే భయం కూడా వారి విచ్చలవిడితనానికి కొంత కళ్ళెం వేసే అవకాశం ఉంది!

తనతో సహజీవనం చేస్తున్నవాడు తనని హింసిస్తున్నాడంటూ కోర్టుకెక్కిన మహిళతో తనకి ఆమెతో పెళ్ళే కాలేదు కాబట్టి ఆ చట్టం వర్తించదని అన్న ప్రబుద్ధుడికి బుద్ధి చెప్పటానికే కేరళ హైకోర్టు వాళ్ళకి కూడా చట్టం వర్తిస్తుందని తీర్పునిచ్చింది.

సహజీవనం సాగించినవాళ్ళలో సుప్రసిద్ధులు జాన్ అబ్రహాం బిపాసాబసు, సైఫ్ అలీ ఖాన్ కరీనా కపూర్ జంటలు.  అందులో మొదటి జంట విడపోయింది కానీ రెండవ జంట పెళ్ళి కూడా చేసుకుని ఆదర్శంగా నిలిచింది.

-శ్రీజ