సరే, బార్ లలో నృత్యాలు చేసుకోండిక

Posted: 07/16/2013 12:51 PM IST

ముంబై బార్ లలోమహిళలు నృత్యాలు చెయ్యటాన్ని మహారాష్ట్ర ప్రభుత్వం నిషేధించింది.  ఆ నిర్ణయాన్ని హైకోర్టు కూడా సమర్థించింది.  దానితో ముంబైలోని బార్ లలో లోగడ లాగా మహిళలకు నృత్యాలు చెయ్యటానికి అవకాశం లేకపోవటంతో ఆ నర్తకులంతా ఉపాధిని కోల్పోయారు.  ఇది జరిగి ఎనిమిది సంవత్సరాలైంది.

అయితే తమ వృత్తి నృత్యం చెయ్యటమేనని, నిషేధం వలన తాము ఉపాధిని కోల్పోయి నానా యాతనలు పడుతున్నామని డ్యాన్సర్లు సుప్రీం కోర్టులో అప్పీలు చేసుకున్నారు.

బోంబే పోలీస్ చట్టం 2005 ప్రకారం బార్ లలో నృత్యాలు చెయ్యటాన్ని మహారాష్ట్ర ప్రభుత్వం నిషేధించింది.  ఈ చట్టం ఆహారపానీయాలు సేవించే చోట, పర్మిట్ రూం లేదా బార్ లేక బీర్ రూంలలో డ్యాన్స్ లు చెయ్యటాన్ని నిషేధించింది కానీ త్రీస్టార్ అంతకంటే పై స్థాయి హోటళ్ళు, కొన్ని పెద్ద సంస్థలలో అందుకు మినహాయింపు ఇచ్చింది.   ప్రజాప్రయోజనాల దృష్ట్యా మత్తు పదార్థాల సేవించే చోటు నృత్యాలు తగవని, అనైతికమని, అశ్లీలమని, వ్యభిచారానికి దారితీసే అవకాశముందని, మహిళలపట్ల దురాచారమని మహారాష్ట్ర ప్రభుత్వం వాదించింది. 

కానీ చట్టం ఎక్కడైనా ఒక్కటే కాబట్టి కొన్ని చోట్ల అనుమతులు మరికొన్ని చోట్ల నిషేధాలుండటం సరికాదని 2006 లో డ్యాన్సర్లు బార్ యజమానులు ఎపెక్స్ కోర్టు ని ఆశ్రయించగా కోర్టు వారి వాదనతో ఏకీభవించింది.  ఈ లోపు బొంబాయి హైకోర్టు రాష్ట్ర ప్రభుత్వం చేసిన చట్టం డాన్సర్లకు వారి వృత్తిని వారు చేసుకునే హక్కుని కాలరాస్తోందని అభిప్రాయపడింది.  దానిని సవాల్ చేస్తూ రాష్ట్ర ప్రభుత్వం సుప్రీంకోర్టులో వేసిన పిటిషన్ ని కొట్టివేస్తూ సుప్రీం కోర్టు నిషేధాన్ని ఎత్తివేసింది. 

సుప్రీం కోర్టు ఆదేశాల ప్రకారం ఇక ముంబైలో ఎక్కడైనా డాన్స్ బార్ లలో డాన్స్ లు నిర్వహించవచ్చు.

-శ్రీజ