శ్రీనివాసన్ అల్లుడు అరెస్ట్ - పదవికి రాజీనామా ?

Posted: 05/25/2013 09:40 AM IST

స్పాట్ ఫిక్సింగ్ వ్యవహారంలో తన అల్లుడు, చెన్నై సూపర్ కింగ్స్ జట్టు సిఈవో, బీసీసీఐ అధ్యక్షుడు శ్రీనివాసన్ అల్లుడు గురునాథన్ మయ్యప్పన్ ను నిన్న అర్థరాత్రి తరువాత క్రైంబ్రాంబ్ పోలీసులు అరెస్టు చేశారు. స్పాట్ ఫిక్సింగ్స్ కుంభకోణంలో ఈయన పై ఆరోపణలు రావడంతో ఇతన్ని విచారణకు హాజరు కావాల్సిందిగా నోటీసులు జారీ చేశారు. ఈ మేరకు ఆయన నిన్న సాయంత్రం క్రైంబ్రాంబ్ పోలీసుల ఎదుట విచారణ కు హాజరయ్యారు. ఈ విచారణలో పలు విషయాల పై ఆరా తీసిన పోలీసులు వారి వద్ద ఉన్న ఆధారాలతో ఇతని పాత్ర ఉన్నట్లు తేల్చి, విచారణ అనంతరం అరెస్ట్ చేసినట్లు ముంబయి క్రైం బ్రాంచ్ పోలీసు బాస్ హిమంశురాయ్ తెలిపారు. ఊటి నుండి ప్రత్యేక విమానంలో ముంబయి చేరుకున్న ఆయన న్యాయవాదితో కలిసి పోలీసుల ముందు హాజరయ్యాడు. దాదాపు మూడు గంటల పాటు విచారించిన తరువాత ఇందులో కీలక వ్యక్తిగా భావిస్తున్న విందూ ధారాసింగ్ తో కలిసి కూడా ప్రశ్నించారు. వారిద్దరి నుండి పలు విషయాలు సేకరించి రికార్డు చేశారు. ఇక అరెస్టు చేసిన గురునాథన్ ని నేడు పోలీసులు కోర్టులో హాజరు పరచనున్నారు.

తన అల్లుడు, చెన్నై సూపర్ కింగ్స్ జట్టు సిఈవో అరెస్టైన పక్షంలో బిసిసిఐ అధ్యక్షుడు శ్రీనివాసన్ రాజీనామా తప్పనిసరిగా చేయాల్సిన పరిస్థితి ఉంటుందని, ఆయనకు పదవి గండం తప్పకపోవచ్చని క్రికెట్ విశ్లేషకులు అంటున్నారు. బోర్డులో శ్రీనివాసన్‌కు మెజార్టీ సభ్యుల మద్దతు ఉంది. శ్రీనివాసన్ ఇప్పటికే రెండు పోస్టుల ఆరోపణలు ఎదుర్కొంటున్నారు. జట్టు ఓనర్, బిసిసిఐ అధ్యక్షుడిగా ఆయన ఉన్నారు. అల్లుడి ఫిక్సింగ్ వ్యవహారం మామ పదవికి గండం తెచ్చింది.

ఈ ఫిక్సింగ్ వ్యవహారంలో అరెస్టు అయిన గురనాథన్ ప్రముఖ సినీ ప్రొడక్షన్ బ్యానర్ అయిన ’ఏవీఎం ప్రొడక్షన్ ’ కుటుంబానికి చెందినవాడు కావడం విశేషం. ఈయన ఆ ఏవీఎం నిర్మాణ సంస్థ అయిన బాలసుబ్రమణియన్ తనయుడు. ఈయన తమిళంతో పాటు వివిధ భాషల్లో సినిమాలు నిర్మించే ఈ సంస్థకు మేనేజింగ్ డైరెక్టర్ కూడా. ఈయన ఫ్యామిలీ విషయానికి వస్తే భార్య, ముగ్గురు పిల్లలు ఉన్నారు. ఇటు క్రికెట్ అధినేత అల్లుడు కావడం, అటు ప్రముఖ నిర్మాణ సంస్థ యాజమాని కొడుకు కావడంతో ఈ ఫిక్సింగ్ వ్యవహారం రెండు వర్గాల్లో హాట్ టాపిక్ గా మారింది. రాను రాను ఈ వ్యవహారంలోకి ఎంతమంది పెద్ద తలకాలు వస్తాయో, ఎందరి పదవులు, కెరియర్ లు ముగుస్తాయో చూడాలి.