నా కారునే ఆపుతావా అంటూ ఆగ్రహం వహించిన ఎమ్మెల్యే

Posted: 04/21/2013 08:55 AM IST

మద్యం సేవించి వాహనాలను నడిపేవాళ్ళ కోసం తనిఖీలు నిర్వహిస్తున్న ట్రాఫిక్ పోలీసు నిన్న అర్థరాత్రి వాహనాలను నిలిపి తన విధిని నిర్వహిస్తుండగా విశాఖ జిల్లా భీమిలి శాసన సభ్యుడు శ్రీనివాసరావు అదే దారిలో కుటుంబ సమేతంగా వెళ్తున్నారు.  విధి నిర్వహణలో ఆ కారుని కూడా ఆపటంతో శ్రీనివాసరావు ఆగ్రహం కట్టలు తెంచుకుంది. 

కుటుంబ సభ్యుల ముందు సామాన్య పౌరుడిలా ఒద్దికగా ట్రాఫిక్ పోలీసుని తనిఖీ చెయ్యనివ్వటం చిన్నతనమనిపించింది కాబోలు, తనెవరో తెలియజెప్పటమే కాకుండా, నా కారునే ఆపుతావా, ఎంత ధైర్యం నీకు, నీ సంగతి తేలుస్తా అని ట్రాఫిక్ పోలీసు మీద విరుచుకుపడ్డారాయన. 

మహారాష్ట్రలో కూడా ఇలాగే జరిగింది.  కారు స్పీడ్ లిమిట్ దాటిందని ఆపేటప్పటికి ఎమ్మెల్యేలకి పట్టరాని కోపం వచ్చేసింది.  కానీ అది ఆ తర్వాత విపరీత పరిణామాలకు దారితీసింది.  ఆ ట్రాఫిక్ పోలీస్ ని ఎమ్మల్యే మిత్రబృందమంతా కలిసి శాసన సభలోనే మూకుమ్మడిగా దాడి చేసేటప్పటికి ఆ ట్రాఫిక్ పోలీస్ స్పృహతప్పి రెండు రోజులు హాస్పిటల్ లో ఉన్నాడు.  పోలీసులు ఆ శాశనసభ్యులమీద  సభాపతికి ఫిర్యాదు చెయ్యగా ఆయన వాళ్ళని సస్పెండ్ చేసారు. అంతటితో ఆగలేదు.  విధి నిర్వహణలో ఉన్న పోలీసుని అడ్డుకున్నందుకు వాళ్ళ మీద కేసు పెట్టారు. కథ మళ్ళీ మలుపు తిరిగింది. 

శాసన సభ్యులంతా ఆందోళన చెయ్యటంతో పాటు, శాసనసభలో ట్రాఫిక్ పోలీస్ కేమి పని, అక్కడ విధి నిర్వహణలో లేడు కదా అని లా పాయింట్ తీసారు.  సస్పెండ్ అయిన శాసనసభ్యుల సస్పెన్షన్ రద్దు చెయ్యటమే కాకుండా, వత్తిడిని తట్టుకోలేక ఆ ట్రాఫిక్ పోలీసుని సస్పెండ్ చేసారు.  దానితో పోలీసు శాఖ ఆ శాసన సభ్యుల సెక్యూరిటీని ఉపసంహరించుకుంది.  ఇలా ఎన్నో మలుపులు తిరిగిందా కథ. 

ఇంతకీ చెప్పొచ్చేదేమిటంటే, చట్టాలను తయారుచేసే వారే చట్టాల అమలుకి అభ్యంతరాలు చెప్పటం ఎలాంటి సంకేతమిస్తోంది?  వాళ్ళు చేసే చట్టాలు వాళ్ళకి వర్తించవనా, వాళ్ళు వాటికి అతీతులనా?  రాజుల కాలం పోయినా ఇంకా ప్రజాప్రతినిధులు పాలించే రాజుల మనస్తత్వాన్నే కలిగివుండటం ఆశించదగ్గది కాదు కదూ!

-శ్రీజ