భద్రాచలంలో శ్రీరామ నవమి

Posted: 04/19/2013 11:51 AM IST

 భద్రాచలంలో అత్యంత వైభవంగా శ్రీరామ నవమి వేడుకలు జరుగుతున్నాయి. రాష్ట్ర ప్రభుత్వం తరఫునుంచి దేవాదాయ శాఖా మంత్రి రామచంద్రయ్య స్వామివారికి పట్టు వస్త్రాలను సమర్పించారు.

ఆదర్శదంపతులుగా పేరుగాంచిన సీతారాముల కళ్యాణాన్ని దేశమంతటా ఘనంగా చేసుకుంటుంది. సీతారాముల కళ్యాణం లోక కళ్యాణానికి హేతువని హైందవులందరూ నమ్ముతారు. అందుకే, భక్తి శ్రద్ధలతో పాటు నిర్వహించటమే కాకుండా శాస్త్రోక్తంగా కళ్యాణ విధిని పూర్తిచేస్తారు.

ఈరోజు భద్రాచలం లో జరిగే శ్రీరామ నవమి కళ్యాణ వేడుకలలో, ఉదయం 8 నుంచి 9 వరకు ధృవమూర్తులకు కళ్యాణం జరిగిన తర్వాత 9 నుంచి 9.30 వరకు జరిగిన అలంకరణ అనంతరం ఉత్సవ విగ్రహాలను ఊరేగింపుగా తీసుకెళ్ళి 10.30 కి కళ్యాణ మండపాన్ని చేరుకుని వివాహానికి ముందుగా చెయ్యవలసిన విష్వక్సేన పూజ, ఆ తర్వాత పుణ్యఃవచనం చేసి, వివాహంలో ఉపయోగించే సామగ్రి సంప్రోక్షణ చేసారు. ఆ తర్వాత రామయ్యకు సీతమ్మకు రక్షాసూత్రాలను కట్టి, రాముడికి బంగారు యజ్ఞోపవీతాన్ని ధరింపజేసారు.

పెళ్ళి తంతు శాస్త్రోక్తంగా జరిగే ఈ విధిలో పెద్దలు రాముడికి సీత తగిన వధువన్న నిర్ణయాన్ని ప్రకటించి, ఇరువైపుల వంశాలను గుర్తుచేస్తారు. పెళ్ళి కొడుకు పాద ప్రక్షాళన తర్వాత పెళ్ళి కూతురు పుష్పోదక స్నానం చేయించటం జరుగుతుంది.

గోదానం చేసి శ్రీరామ చంద్రునికి సీతమ్మను కన్యాదానం చేస్తారు. కన్యాదాన ఫలితం కోసం షోడశ దానాలు చేసి వధూవరులకు మంగళాశీస్సులను చదువుతారు. తర్వాత శుభలగ్నానికి జీలకర్ర బెల్లం మాడు మీద పెట్టటం, తలంబ్రాలు తలమీద పోసుకోవటం, ఆ తర్వాత బ్రహ్మముడి వేస్తారు. చివరిగా మంగళహారతి ఇచ్చి ఆశీర్వదిస్తారు.

వివాహం జరిగేది భగవంతునిగా కొలిచే ఆరాధ్య దైవానికైనా, తంతు మాత్రం మానవులు చేసుకునే విధానంలో ఉంటుంది. ఎందుకంటే పరమాత్మ మానవ రూపంలోనే అవతారమెత్తి మనందరికీ ఆదర్శ ప్రాయమైన జీవన విధానాన్ని స్పయంగా పాటించి తెలియజేసారు కాబట్టి.

ఆనవాయితీ ప్రకారం ముఖ్యమంత్రి కిరణ్ కుమార్ రెడ్డి మంచి ముత్యాలను తలంబ్రాలలో కలపటానికి తీసుకెళ్ళారు.

-శ్రీజ