Posted: 01/22/2013 11:51 AM IST

ఢిల్లీలో జరిగిన గ్యాంగ్ రేప్ సంఘటన పై  భారత ప్రధాన న్యాయమూర్తి(సీజేఐ) జస్టిస్ అల్తమస్ కబీర్ సంచలన వ్యాఖ్యలు చేశారు. గృహ హింసపై మహిళల రక్షణ చట్టం-2012 మీద ఢిల్లీలో సోమవారం జరిగిన ఆరో జాతీయ సదస్సులో పాల్గొన్న ఆయన మాట్లాడుతూ.... ఢిల్లీలో గ్యాంగ్ రేప్ బాధితురాలికి మద్దతుగా ఆ రోజు నేను కూడా అక్కడుంటే బాగుండేదనుకున్నా. డిసెంబర్ 16నాటి సంఘటన (గ్యాంగ్‌రేప్) వంటిది కొత్తదేమీ కాదు. కానీ, దానిపై ప్రజలది మాత్రం ధర్మాగ్రహమే. పూర్తిగా అవసరమైనది కూడా. అందుకే జనాన్నంతటినీ ఒక్కటి చేసి రోడ్లపైకి రప్పించింది. పిల్ల కాలువలా మొదలైన జనాగ్రహం మహా ప్రవాహమై దేశాన్నే ముంచెత్తింది. అందులో పాల్గొన్న ప్రతి ఒక్కరికీ శాల్యూట్ చేస్తున్నా. ఆ రోజు ఢిల్లీ గేట్ దగ్గర నా మేనల్లుడు కూడా లాఠీదెబ్బలు రుచిచూశాడు.అలాంటి మహోద్యమంలో భాగమై నేనూ రోడ్డెక్కితే బాగుండుననిపించింది. కానీ, అలా చేయలేకపోయా.

ఆ తర్వాత ఉద్యమాన్ని కొన్ని శక్తులు హైజాక్ చేశాయి. అటువంటి వ్యక్తులు, బృందాలు తమ ప్రయోజనాల కోసం ఇలా చేయడాన్ని మనం సహించకూడదు. ఢిల్లీ వీధుల్లో దారుణం ఒక వ్యక్తిమీద జరిగింది కాదు. అది మహిళలందరిమీదా, అంతిమంగా సమాజంపైనే జరిగిన ఘోరం. మనం సిగ్గుతో తలదించుకోవాల్సిన సంఘటన. కాబట్టే జనంలో ఆగ్రహావేశాలు పెల్లుబికాయి. సమాజాన్ని పునరాలోచన దిశగా మళ్లించాయి . ఈ సందర్భంగా ఆయన తన మనోభావాలను ఆహూతులతో పంచుకున్నారు. మొదట్లో శాంతియుతంగా మొదలైన ఆందోళనను కొన్ని ఇతర పరిస్థితులు వికృతంగా మార్చాయని పేర్కొన్నారు. ఇటువంటి కేసులలో న్యాయ వ్యవస్థ ఆలోచన ధోరణి మారాలని పిలుపునిచ్చారు.