Posted: 12/18/2012 09:16 AM IST

హైదరాబాద్ లోని బేగంపేట అర్థరాత్రి ఉలిక్కిపడింది. అందరూ ప్రశాంతంగా నిద్రపోతున్న సమయంలో విమానాశ్రయంలో భారీ అగ్ని ప్రమాదం సంభవించింది. హైదరాబాద్ కి మొట్టమొదటి ఎయిర్ పోర్టు అయిన బేగం పేట విమానాశ్రయంలో భారీ అగ్ని ప్రమాదం జరిగింది. ఈ అగ్ని ప్రమాదంలో నాలుగు చార్టర్డ్ విమానాలు, ముఖ్యమంత్రి ఉపయోగించే హెలికాప్టర్ కూడా కాలి బూడిది అయ్యాయి. అర్థరాత్రి దాటిన తరువాత ఈ అగ్రి ప్రమాదం జరగడంతో భారీ ఆస్థినష్టం వాటిల్లినట్లు తెలుస్తుంది. బోయిన్ పల్లిలోని విమానాలకు మరమత్తులు చేసే షెడ్డులో అర్థరాత్రి దాటిన తరువాత మంటలు చెలరేగాయి. వీటిని సెక్యూరిటీ సిబ్బంది గమనించక పోవడంతో అక్కడ ఉన్న మరో రెండు షెడ్లకు కూడా మంటలు వ్యాపించాయి. ఈ విషయం తెలుసుకున్న అగ్ని మాపక యంత్రాలు మంటలు ఆర్పే ప్రయత్నం చేశాయి, కానీ అప్పటికే మంటలు భారీగా విస్తరించడంతో మంటలు అదుపుకాలేక పోయాయి. దీంతో హైదరాబాద్ లో ఉన్న 11 ఫైర్ స్టేషన్ల నుండి ఫైర్ ఇంజన్లను తెప్పించి మంటలు ఆర్పే ప్రయత్నం చేస్తున్నారు. కేవలం వీటితోనే కాకుండా, అత్యాధునికంగా కార్బన్ డయాక్సైడ్ ఫోమ్‌తో మంటలు ఆర్పే యంత్రాలనూ రప్పిస్తున్నారు.

ఎయిర్ పోర్ట్ చుట్టు భారీ కంచె ఉండటంతో మంటలు ఆర్పేందుకు చాలా కష్టంగా మారింది. డిజిటల్ హైడ్రాలిక్ యంత్రాలు మంటలను ఆర్పేందుకు బయటి నుంచే ప్రయత్నిస్తున్నాయి. అర్ధరాత్రి దాటిన తర్వాత పేలుడు శబ్దాలు కూడా వినిపించాయని స్థానికులు చెబుతున్నారు. విమానాశ్రయం చుట్టు పక్కల ప్రాంతాల్లో ఉండేవారు ప్రాణాలు అరచేతిలో పెట్టుకొని పరుగులు తీశారు. ప్రమాదానికి కారణాల పై అధికారులు ఆరా తీస్తున్నారు. ప్రమాదానికి గురైన షెడ్డులో ఈ ఇంధన బ్యారెళ్లు ఉండటం వల్లనే మంటలు ఎక్కువగా ఉన్నట్లు అధికారులు చెబుతున్నారు. అయితే కేవలం అతి ముఖ్యుల రాకపోకలకు, వైమానిక విన్యాసాలకు మాత్రమే ఇప్పుడు దీన్ని ఉపయోగిస్తున్నారు. ముఖ్యమంత్రి, ప్రధానమంత్రి లాంటి వీఐపీలు కూడా ఈ విమానాశ్రయం నుంచే రాకపోకలు సాగిస్తుంటారు. అయితే స్థానికులు మాత్రం అధికారుల నిర్లక్ష్యం వల్లనే ఈ ప్రమాదం జరిగిందని అంటున్నారు.