Chandrababu Meets Balakrishna

Posted: 09/17/2012 07:00 PM IST

Chandrababu తెలుగుదేశం పార్టీ అధ్యక్షుడు నారా చంద్రబాబునాయుడు కుటుంబ సభ్యులకు ఆయన వియ్యంకుడు, సినీ నటుడు నందమూరి బాలకృష్ణ ఆదివారం విందు ఇచ్చారు. అమెరికాలో విద్యనభ్యసిస్తున్న నారా బ్రహ్మణి ఈ నెల తొమ్మిదిన నగరానికి వచ్చారు. త్వరలో ఆమె హెరిటేజ్ ఫుడ్స్‌లో కీలక బాధ్యతలు చేపడతారని కొద్ది రోజుల క్రితం చంద్రబాబు ప్రకటించారు. కుమార్తె నగరానికి చేరుకోవటంతో అల్లుడితో పాటు ఆయన కుటుంబసభ్యులను కూడా బాలకృష్ణ విందుకు ఆహ్వానించారు. మధ్యాహ్నం 12 గంటల సమయంలో కుమారుడు, సతీమణితో కలిసి బాలకృష్ణ నివాసానికి వచ్చిన చంద్రబాబు రెండు గంటలకుపైగా అక్కడ ఉన్నారు. వీరందరూ తాజా, కుటుంబ రాజకీయాలపై చర్చించినట్లు సమాచారం. చంద్రబాబు వచ్చేనెల 2న ఆదిలాబాద్ జిల్లా ఉట్నూరు నుంచి మహాయాత్ర పేరుతో పాదయాత్రను ప్రారంభించనున్నారు. ఈ నేపథ్యంలో పార్టీ కార్యకలాపాలను పర్యవేక్షించే బాధ్యతను లోకేష్‌కు అప్పగించారు. ఇదే విషయమై వారి మధ్య ప్రధానంగా చర్చ జరిగినట్లు సమాచారం. తాను యాత్ర చేసే సమయంలో పార్టీ పనులను లోకేష్ పర్యవేక్షిస్తారని, అవసరమైతే మీరు కూడా సాయం చేయండని బాలకృష్ణను చంద్రబాబు కోరారని, అందుకు ఆయన సమ్మతించారని పార్టీవర్గాల సమాచారం.