ITEMVIDEOS: బిజీ హైవేపై విమానం ఎమర్జెన్సీ ల్యాండింగ్.. తప్పుకున్న వాహనాలు

Posted: 07/12/2022 03:38 PM IST

అది రహదారి. నిత్యం వేలాది కార్లు, ఇతర భారీ వాహనాలు వెళ్తుండే రహదారి. ఈ హైవేపై బిజీగా కార్లు వెళ్తున్నాయి. అదే సమయంలో అదే రోడ్డుపై ఓ అత్యంత భారీ వాహనం ఎదురుగా రావడం చూసి అంతా షాక్ అయ్యారు. ఏంటిదీ ఇది ఆకాశంలో విహరించాల్సిన వాహనమే కదా.. మరీ రోడ్డుపైకి ఎందుకు వచ్చింది. ఎందుకని తమకు ఇబ్బందులను కలగజేసేలా చేసిందని అందరూ భావించారు. ఈ లోగా రోడ్డుపై దిగిన ఆ భారీ వాహనం కొంత దూరం రోడ్డుపై పరుగుపెట్టి ఓ కూడలి వద్ద నిలిచిపోయింది. ఏదో సమస్య వచ్చి ఉంటుంది.. అందుకనే ఇలా రోడ్డుపై విహంగం వాలిపోయిందని కొందరు భావించారు.

మీకూ మ్యాటర్ అర్థమైపోయిందనుకుంటా.. గాల్లో ఎగరాల్సిన విమానం రోడ్డుపైకి ఎందుకు వచ్చిందా.? అనుకుంటున్నారా.? తిరుగుతున్న ఒక సింగిల్ ఇంజిన్ విమానం.. నెమ్మదిగా ఆ రోడ్డుపై ల్యాండయింది. అది చూసిన వాహనదారులు ఆశ్చర్యపోయారు. దీనికి సంబంధించిన వీడియో ప్రస్తుతం నెట్టింట వైరల్ అవుతోంది. ఆ విమానం నడుపుతున్న విసెంట్ ఫ్రేజర్ అనే వ్యక్తి మాజీ మరీన్. ప్రయాణంలో ఉండగా ఆ చిన్న విమానం ఇంజిన్ ఫెయిలైంది. దీంతో దాన్ని రోడ్డుపై ఎమర్జెన్సీగా దింపేయాలని ఫ్రేజర్ నిర్ణయించుకున్నాడు.

రోడ్డుపై వెళ్తున్న కార్లు, ఎత్తుగా ఉన్న ఎలక్ట్రిసిటీ వైర్లను త్రుటిలో తప్పించుకుంటూ చాకచక్యంగా విమానాన్ని రోడ్డుపై ల్యాండ్ చేశాడు. నార్త్ కరోలినాలోని స్వెయిన్ కౌంటీలో ఈ ఘటన జరిగింది. ఈ వీడియోను ఫేస్‌బుక్‌లో షేర్ చేసిన ఆ సిటీ పోలీసులు.. ఆ సమయంలో ఎలక్ట్రిసిటీ వైర్లు తగిలినా, కార్లకు డ్యాష్ ఇచ్చినా ఎంతో ప్రమాదం జరిగేదన్నారు. కానీ అదృష్టవశాత్తూ ఏమీ జరగలేదని కొనియాడారు. ప్రస్తుతం ఈ వీడియో నెట్టింట వైరల్ అవుతోంది. ఫ్రేజర్ నైపుణ్యాన్ని నెటిజన్లు మెచ్చుకుంటున్నారు.