అడవిలో అహ్లాదంగా పెళ్లి రోజు వేడుకలు.. అనుకోని అతిధి

Posted: 07/12/2020 12:42 AM IST

కరోనా సమయంలో ఎక్కడ ఏ వేడుకలు చేసుకున్నా ఇబ్బందిగా భావించిన ఓ జంట.. తమ బంధుమిత్రులతో కలసి సురక్షితమైన.. ఏ బదరాబంధీ లేని ప్రాంతంలో వేడుక చేసుకోవాలని భావించింది. అంతే వారికి తమకు చేరువలో వున్న అటవీ ప్రాంతం కన్నా సురక్షితమైన ప్రాంతం ఏదీ లేదని తోచింది. అంతే తమ మిత్రబృందంతో కలసి స్థానికంగా వున్న అటవీ ప్రాంతానికి వెళ్లి సంబరాలు ప్రారంభించారు. అంతే అప్పటికే ఎంతో సేపట్నించి ఓ చెట్టుపై నుంచి చూస్తున్న ఓ జీవి కేక్ కట్ చేయగానే అమాంతం కేక్ మొత్తాన్ని తీసుకుని వెళ్లింది. మా అడవిలో ఈ మానవ మాత్రులకేం పని..? అనుకుందో లేక మరేంటో తెలియదు కానీ ఆ జీవి చేసిన పనికి సంబంధించిన వీడియో నెట్టింట్లో వైరల్ అవుతోంది.

ఇండియన్ ఫారెస్ట్ సర్వీస్ ఆఫీసర్ సుశాంత నంద... ఈ వీడియోను సోషల్ మీడియాలో పోస్ట్ చేశారు. ఇందులో ఓ వ్యక్తి... తనకు పెళ్లై అయి సంవత్సరం పూర్తైన సందర్భంగా... అడవిలో చిన్న కేకు పార్టీ ఏర్పాటు చేశాడు. అందరూ చూస్తుండగా... ఓ రాయిపై చాకొలెట్ కేకు ఉంచి... చాకుతో ఓ ముక్కను కట్ చేశాడు. ఆ ముక్కను ఎవరికో ఇవ్వబోతుంటే... అతని వెనక నుంచి వచ్చిన ఓ కోతి... కాళ్ల మధ్య నుంచి... రాయిని చేరి... ఈజీగా కేకు మొత్తాన్నీ లాక్కొని... చకచకా చెట్టెక్కేసింది. అంతే... పార్టీ కాస్తా... చెట్టెక్కినట్లైంది. కోతి అలా చేస్తుందని అస్సలు ఊహించని వారంతా... స్టన్ అయి దాన్ని చూస్తూ ఉండిపోయారు.

ఈ ఫన్నీ వీడియో అందరికీ తెగ నచ్చేస్తోంది. అడవిలో పార్టీలు పెట్టుకుంటే ఇలా అవుతుందని నెటిజన్లు సరదా కామెంట్లు చేస్తున్నారు. అడవుల్లో పార్టీలకు సర్‌ప్రైజ్‌లు గ్యారెంటీ అని నందా కాప్షన్ పెట్టారు. జులై 9న పోస్ట్ చేసిన ఈ వీడియోని ఇప్పటికే... 32వేల మంది చూడగా... 3వేల మందికి పైగా లైక్ చేశారు. నెటిజన్లు ఈ వీడియో చూసి బాగా నవ్వుతున్నారు. ఓ యూజర్ ఏం రాశారంటే... "కోతి: నువ్వు నన్ను పిలిచావా లేదా అన్నది నాకు అనవసరం. నేను ఎంటరైతే... అంతా నా కంట్రోల్‌లో ఉంటుంది." మరో యూజర్ ఏమన్నారంటే... అడవిలో జంతువులు ఉండటం కామన్ కాబట్టి... ఈ పార్టీకి అతనే అతిథిగా వచ్చినట్లు లెక్క అని అన్నారు. మరొకరు... "మంచి కోతి... ఆ కేకును కోసే వరకూ ఆగింది" అని రాశారు.

Celebrating wedding anniversary in Forest is an experience altogether....

Surprises guaranteed pic.twitter.com/gFR7glcmp6

— Susanta Nanda IFS (@susantananda3) July 9, 2020