శ్రీదేవి కోసం స్పెషల్ జెట్ విమానం

Posted: 02/26/2018 09:39 AM IST

దివంగత సినీతార శ్రీదేవీ పార్థివదేహం మరికొద్ది సేపట్లోనే ముంబైకి రానుంది. ఇండియన్ మిలీనియర్స్ అంబానీ కుటుంబానికి చెందిన ప్రత్యేక జెట్‌ విమానంలో ఆమె భౌతిక కాయాన్ని దుబాయ్ నుంచి తీసుకురానున్నారు. ఇందుకోసం ఇప్పటికే ఏర్పాట్లు పూర్తయ్యాయి. గత రాత్రి శ్రీదేవీకి పోస్ట్‌మార్టం ప్రారంభమైన సమయంలోనే ఈ విమానం బయలుదేరి వెళ్లింది.

రిలయన్స్‌ ట్రాన్స్‌పోర్ట్‌ అండ్‌ ట్రావెల్‌ లిమిటెడ్‌కు చెందిన (ఎంబ్రార్‌-135బీజే) విమానం తన సేవలను అందించనుంది. ఈ సంస్థ ప్రస్తుతం అనిల్‌ అంబానీ ఆధ్వర్యంలో నడుస్తోంది. ఇక బోనికపూర్‌ మేనల్లుడు మొహిత్‌ మార్వా పెళ్లి కోసం రస్‌ ఆల్‌ ఖైమాకు వెళ్లిన శ్రీదేవి శనివారం రాత్రి తీవ్ర గుండెపోటుతో హఠాన్మరణం చెందిన సంగతి తెలిసిందే. దుబాయ్‌లోని రషీద్‌ ఆసుపత్రిలో ఇప్పటికే శ్రీదేవి పోస్టుమార్టం పూర్తయింది. అయితే, దౌత్య వ్యవహారాల కారణంగా భౌతికాయం తరలింపు ఆలస్యమవుతోంది.

శ్రీదేవి పార్థివదేహాన్ని మొదట అంధేరీలోని ఆమె ఇంటికి తరలిస్తారు. అటు నుంచి మెహబూబా స్టూటియోకు తీసుకెళతారు. అనంతరం జుహూలోని శాంతా క్రజ్‌ శ్మశాన వాటికలో అంత్యక్రియలు నిర్వహిస్తారు.