ITEMVIDEOS:ఎయిర్ పోర్ట్ లో రచ్చ రేపిన టీడీపీ ఎంపీ

Posted: 10/29/2016 12:32 PM IST

అనంతపురం టీడీపీ ఎంపీ జేసీ దివాకరరెడ్డి... సొంత పార్టీ అని కూడా చూడకుండా సంచలన వ్యాఖ్యలు చేయటం ఆయన నైజం. ప్రత్యేక హోదా దగ్గరి నుంచి పాలనపరంగా దేన్ని వదలకుండా చాలా విషయాల్లో విమర్శలు చేస్తూ వస్తున్నారు. తాజాగా మరోసారి సంచలన పనితో వార్తల్లో నిలిచాడు. గన్నవరం విమానాశ్రయంలో హల్ చల్ చేసిన ఈ అధికార పార్టీ ఎంపీ ఫర్నీఛర్ ధ్వంసం చేయబోయారన్న వార్తలు చానెళ్లలో ప్రముఖంగా ప్రసారం అవుతున్నాయి.

విషయం ఏంటంటే... శుక్రవారం అమరావతి పరిపాలన నగరం కార్యక్రమం పూర్తియిన తర్వాత ఢిల్లీకి వెళ్లేందుకు ఆయన ఎయిపోర్ట్ కు వచ్చారు. ఎయిర్ ఇండియా విమానంలో ఆయన న్యూఢిల్లీ వెళ్లవలసి ఉంది. ఆయన వచ్చేసరికి ఆ విమానం వెళ్లిపోయింది. దీంతో ఆయన కోపం కట్టలు తెంచుకుంది. తాను వస్తున్నానని చెప్పినా విమానం నిలపకపోవడంపై ఆయన ఉగ్రతాండవమే చేశారంట.

 

సాయంత్రం 4.45 గంటలకు ఎయిర్‌ ఇండియా విమానం ఢిల్లీ నుంచి హైదరాబాదు మీదుగా గన్నవరం చేరుకుంది. అందులో ప్రయాణించేందుకు జేసీ 5.30 గంటలకు విమానాశ్రయానికి చేరుకున్నారు. అప్పటికే విమానం బోర్డింగ్‌ పూర్తి చేసుకుందని మేనేజరు చెప్పాడు. అయితే విమానం ఇంకా బయలుదేరలేదు కదా.. అవకాశం కల్పించాలని జేసీ కోరాడు. పైలెట్‌ ఒక్కసారి డోర్‌ క్లోజ్‌ చేసిన తర్వాత తీయటం అసాధ్యమన్నారు. పైగా మీ ప్రయాణం లేదని ప్రోటోకాల్‌ వారు చెప్పటంతోనే బోర్డింగ్‌ ముగించినట్లు చెప్పాడు. దీంతో ఎంపీ అయిన నాకే బోర్డింగ్‌ క్లోజ్‌ అని చెబుతారా? అంటూ జేసీ ఆగ్రహం వ్యక్తం చేశారు.

తనదైన శైలిలో తిట్లపురాణం అందుకున్నారు. చివరకు ఎయిర్ ఇండియా కార్యాలయంలోకి దూసుకెళ్లి అక్కడున్న కంప్యూటర్లను ధ్వంసం చేసేందుకు ప్రయత్నించారు. అడ్డుకునేందుకు యత్నించిన పోలీసులపై ఆగ్రహం వ్యక్తం చేశారు. ఈ ఉదంతం అంతా ముఖ్యమంత్రి చంద్రబాబు ఎయిర్‌పోర్టు లాంజ్‌రూమ్‌లో ఉండగానే జరగడం గమనార్హం. విషయం తెలుసుకున్న విజయవాడ ఎంపీ కేశినేని నాని అక్కడకు చేరుకుని ఎంపీ జేసీని సముదాయించటంతో శాంతించారంట.