ఆ ‘పుర్రె’ షీనాబోరాదేనా?

Posted: 09/05/2015 10:25 AM IST

Sheena bora murder case skull forensic test digital superimposition indrani mukherjea

దేశవ్యాప్తంగా సంచలనం సృష్టించిన షీనాబోరా హత్య కేసు విచారణలో భాగంగా పోలీసులు ఓ అరుదైన విషయాన్ని కనుగొనగలిగారు. షీనాను హతమార్చిన స్థలంలో అంటే రాయ్ గఢ్ అడువుల్లో సోదాలు నిర్వహించిన పోలీసులకు ఓ పుర్రె లభ్యమైంది. ఆ పుర్రె షీనాబోరా ముఖ రేఖాకృతితో సరిపోలినట్లుగా తమ డిజిటల్ సూపరింపొజిషన్ లో తేలిందని శుక్రవారం ముంబై పోలీసులు వెల్లడించారు. ఆ స్థలంలో ఆమె బాడీకి సంబంధించిన ఇతర భాగాలు కూడా లభ్యమవుతాయేనన్న విషయంపై సోదాలు నిర్వహిస్తున్నట్లుగా వారు పేర్కొన్నారు.

మరోవైపు.. ఈ హత్యకేసులో భాగంగా ఇంద్రాణి ముఖర్జియా, ఆమె మాజీ భర్త సంజీవ్ ఖన్నా, డ్రైవర్ శ్యామ్ రాయ్ లు పోలీస్ కస్టడీలో వున్న విషయం తెలిసిందే. ఇప్పటికే వీరిని పలుసార్లు విచారించారు. మరోసారి శుక్రవారం సాయంత్రం ఆ ముగ్గురితోపాటు పీటర్, షీనా తండ్రి సిద్ధార్థ్ దాస్ తదితరులను ఖార్ పోలీస్ స్టేషన్ లో సుదీర్ఘంగా విచారించారు. అలాగే.. తొలిసారి ఇంద్రాణి, ఖన్నాల కూతురు విధిని కూడా కాసేపు ప్రశ్నించి పంపించేశారు. ఇదిలావుండగా.. ఈ కేసులో ఇంద్రాణి భర్త పీటర్ ముఖర్జియాను తామింకా నిర్దోషిగా తేల్చలేదన్నారు. ఇంకా అతనిని నిందితుడిగా కూడా చేర్చలేదని తెలిపారు. ఈ కేసులో భాగంగా ఆయన్ను విచారించేందుకు స్టేషన్ కు పిలిచినట్లు స్పష్టం చేశారు.

కాగా.. ఈ కేసు నుంచి బయటపడేందుకు ఇంద్రాణి రకరకాల కొత్త కథనాలను పోలీసుల విచారణలో వెల్లడిస్తోంది. ఇప్పటికే షీనా బతికేవుందని ఓసారి, మిఖాయిల్ తన కొడుకే కాదని మరోసారి, ఇలా నాటకాలాడుతూ వస్తోంది. ఈ కేసును తప్పుదోవ పట్టించేందుకు ఆమె ఇలా డొంకతిరుగుడు కథనాలు సృష్టిస్తోందని భావించిన పోలీసులు.. తమదైన రీతిలో ఆమెను విచారిస్తున్నట్లు తెలుస్తోంది.