రేవంత్ రెడ్డి అరెస్ట్.. కానీ కొత్త కేసులో

Posted: 08/20/2015 11:34 AM IST

తెలంగాణ తెలుగుదేశం పార్టీ పైర్ బ్రాండ్ రేవంత్ రెడ్డి మరో సారి వార్తల్లోకెక్కారు. గతంలో ఓటుకు నోటు వ్యవహారంలో తెలుగు రాష్ట్రాల్లో సంచలనం సృష్టించిన రేవంత్ రెడ్డి వ్యవహారం గురించి అందరికి తెలుసు. అయితే ఓటుకు నోటు వ్యవహారం కేసులో బెయిల్ పొందిన రేంవత్ రెడ్డి గత కొంత కాలంగా కోర్ట్ఖ ఉత్తర్వుల మేరకు తన నియోజక వర్గం లోనే ఉంటున్నారు. కోర్ట్ అనుమతి లేకుండా ఎక్కడికి వెళ్లడానికి వీలులేదని హైకోర్ట్ విడుదల సమయంలో గట్టిగా హెచ్చిరించింది. దాంతో రేవంత్ తన స్వంత నియోజక వర్గానికి మాత్రమే పరిమితమయ్యారు.అయితే తాజాగా పోలీసులు మరోసారి రేవంత్ రెడ్డిని అరెస్టు చెయ్యడంతో వార్తల్లో నిలిచారు. అయితే ఈ సారి పోలీసులు ఓటుకు నోటు కేసులో కాకుండా వేరే కేసులో అరెస్ట్ చెయ్యడం విశేషం. రేవంత్ రెడ్డిని అరెస్ట్ చెయ్యడమే కాకుండా రేవంత్ రెడ్డి అనుచరుల మీద పోలీసులు లాఠీలు ఝులిపించారు.

మహబూబ్ నగర్ జిల్లా కొడంగల్ లోని మార్కెట్ యార్డ్ లో కొత్తగా నిర్మించనున్న గోడౌన్ శంఖుస్థాపన కార్యక్రమానికి మంత్రి జూపల్లి కృష్ణారావు విచ్చేశారు. అయితే స్థానిక ఎమ్మెల్యే రేవంత్ రెడ్డి తన అనుచరులతో ఆ కార్యక్రమానికి చేరుకోవడంతో అక్కడ ఉద్రిక్తత నెలకొంది. మంత్రి స్థానిక ఎమ్మెల్యేను కలుపుకుపోకుండా ప్రోటోకాల్ ను ఉల్లంఘిస్తున్నారని రేవంత్ రెడ్డి మండిపడ్డారు. తన అనుచరలతో కలిసి అక్కడికి చేరుకోగా టిడిపి కార్యకర్తలు ప్రభుత్వానికి, జూపల్లికి వ్యతిరేకంగా నినాదాలు చేశారు. అయితే అక్కడ ఉద్రిక్త పరిస్థితి నెలకొనడంతో ఎమ్మెల్యే రేవంత్ రెడ్డిని పోలీసులు అరెస్ట్ చేశారు. అయితే అక్కడే ఉన్న టిడిపి కార్యకర్తలు, రేవంత్ అభిమానులు పోలీసుల వాహనం మీదకు రాళ్లు రువ్వడంతో పరిస్థితి దారుణంగా మారింది. దాంతో పోలీసులు వారి మీద లాఠీఛార్జ్ చేశారు. ప్రస్తుతానికి అక్కడ పరిస్థితి అదుపులో ఉన్నట్లు పోలీసులు వెల్లడించారు.