మహిళ బట్టలు విప్పి ఊరేగించారు.. అరెస్టయ్యారు.

Posted: 11/11/2014 02:17 AM IST

Woman stripped and paraded on donkey in rajasthan

దేశం ఎంతగా అభివృద్ది చెందుతుందో కొన్ని విషయాల్లో సమాజం అంతే వెనక్కి వెళ్తోంది. పాతకాలపు ఆచారాలు, సాంప్రదాయాలే కాదు.., హేయమైన విధానాలు కూడా ఇంకా కొనసాగుతున్నాయి. గ్రామాల్లో పంచాయతీ వ్యవస్థ ఇప్పటికీ చాలాచోట్ల కొనసాగుతోంది. ఇక్కడ చాలాసార్లు వివాదాస్పదమైన, భరించలేని శిక్షలు విధిస్తారు. వీటిని అతిక్రమిస్తే మరిన్ని శిక్షలు తప్పవు. అంతేకాకుండా బహిష్కరణలు, జరిమానాలు విధించి వేధింపులకు గురిచేస్తారు. ఇక శిక్షల్లో వర్గం, స్ర్తీ, పురుష తేడాలను బట్టి శిక్షలు అమలు చేస్తారు.

తాజాగా రాజస్థాన్ లో ఓ గ్రామంలో పంచాయతి పెద్దలు దారుణానికి పాల్పడ్డారు. 45సంవత్సరాల మహిళను వివస్ర్తను చేసి గాడిదపై ఊరేగించారు. ఈ కేసు వివరాలు చూస్తే.., బాధిత మహిళ తన మేనల్లుడిని చంపినట్లు ఆరోపణలు ఎదుర్కుంటోంది. ఈ వివాదంపై పంచాయతీ పెట్టిన పెద్దలు, మహిళను దోషిగా నిర్ధారించారు. చేసిన తప్పుకు గాను.., బట్టలు విప్పదీసి గాడిదపై ఊరేగించాలని ఆదేశించారు. గ్రామ పెద్దల ఆదేశాల ప్రకారం, బాధితురాలిని వివస్ర్తను చేసి గాడిదపై ఊరిలో ఊరేగించారు.

ఈ విషయం తెలిసిన పోలిసులు చాలా సీరియస్ అయ్యారు. పంచాయతీ పేరుతో జరిగిన దారుణంను తెలుసుకుని కేసు పెట్టారు. సోమవారం వరకు ఈ కేసులో 30మందిని అరెస్టు చేశారు. ఘటనలో భాగస్వామ్యం ఉన్న మిగతావరి కోసం విచారణ మొదలు పెట్టారు. అటు బాధిత మహిళను రెస్య్కూ హోంకు తరలించి కౌన్సిలింగ్ అందిస్తున్నారు. అటు ఈ ఘటనపై మహిళా లోకం నుంచి విమర్శలు వస్తున్నాయి. బాధితురాలు నేరం చేసి ఉంటే పోలిసులకు అప్పగించాల్సింది పోయి ఆమెను అవమానించటం ఎంతవరకు సమంజసమని ప్రశ్నలు వస్తున్నాయి.

కార్తిక్