మహారాష్ట్ర, హర్యానాల్లో ప్రధాని మోడీ ఎన్నికల ప్రచారం

Posted: 10/01/2014 03:54 PM IST

Pm modi to campaign in maharastra haryana from 4th

మహారాష్ట్ర, హర్యానా రాష్ట్రాల శాసనసభ ఎన్నికలకు జరుగుతున్నపోరులో తమ పార్టీకి అధికారం కట్టబెట్టేందుకు ప్రధాని నరేంద్రమోడీ ఎన్నికల ప్రచారం నిర్వహించనున్నారు. అక్టోబరు 15న జరగనున్న శాసనసభ ఎన్నికల కోసం నరేంద్రమోదీ ఈ నెల 4నుంచి ప్రచారం చేయతలపెట్టారు. ఆ రెండు రాష్ట్రాల్లో కాంగ్రెస్ నుంచి అధికారాన్ని కైవసం చేసుకోవాలని బీజేపి వ్యూహ రచన చేస్తోంది. పార్టీ సీనియర్ నాయకులు ఎల్.కె.అద్వానీ, మురళీ మనోహర్ జోషీలు కూడా మహారాష్ట్రలో ప్రచారం చేపట్టనున్నారని పార్టీ వర్గాలు తెలిపాయి.

ఇటీవల రెండు పర్యాయాలు జరిగిన ఉప ఎన్నికలలో బీజేపికి ఎదురుగాలి వీచింది. తమవైన స్థానాలను కూడా కోల్పోయింది. అటు బీహార్, ఇటు ఉత్తర్ ప్రదేశ్ లలో ప్రాంతీయ పార్టీలు సత్తా చాటాయి. దీంతో మహారాష్ట్ర, హర్యానా ఎన్నికలలో తమ సత్తా చాటాలని పార్టీ నేతలు నరేంద్రమోడీకి ఇదివరకే కోరినట్లు సమాచారం. అదీ గాక, ఈ రెండు రాష్ట్రాల్లోనూ కాంగ్రెస్ పార్టీయే అధికారంలో వుండడం, అక్కడి ప్రభుత్వాలపై వ్యతిరేకత కూడా రావడంతో.. ఈ రెండు రాష్ట్రాలను తన ఖాతాలో వేసుకునేందుకు మోడీ సన్నదమవుతున్నారని సమాచారం. కాంగ్రెస్ నుంచి అధికారాన్ని లాక్కుని తమ సత్తాను మరోమారు చాటాలని బీజేపి ఉత్సాహపడుతోంది.

ఈ నేపథ్యంలో మోడీ ఆయా రాష్ట్రాల ప్రచార కార్యక్రమంలో పాల్గొంటారని పార్టీ వర్గాలు పేర్కోన్నాయి. ఆయనతో పాటు పార్టీ స్టార్ ప్రచారకర్తల జాబితాలో వారి పేర్ల లేకపోవడంతో హర్యానాలో వారిద్దరు ప్రచారం చేయకపోవచ్చునని తెలుస్తోంది. పార్టీ వర్గాలు సమాచాం మేరకు.. అక్టోబరు 4 నుంచి ప్రారంభమయ్యే ప్రచారంలో భాగంగా ప్రధాని హర్యానాలో 10 ర్యాలీల్లో, మహారాష్ట్రలో 24 ర్యాలీల్లో పాల్గొంటారు. బీజేపి ముఖ్యమంత్రులు శివరాజ్‌సింగ్ చౌహాన్, రమణ సింగ్, వసుంధర రాజే, మనోహర్ పారికర్, ఆనందిబెన్ పాటిల్‌లతో పాటు పార్టీ అధ్యక్షుడు అమిత్ షా, సీనియర్ నాయకులు, కేంద్రమంత్రులు రాజ్‌నాథ్ సింగ్, నితిన్ గడ్కరీ, సుష్మాస్వరాజ్, అరుణ్ జైట్లీ తదితరులు మహారాష్ట్ర, హర్యానా రాష్ట్రాల్లో ఎన్నికల ప్రచారంలో పాల్గొంటారు.

జి.మనోహర్