కారు ఎక్కేందుకు మోజు పడుతున్న సైకిల్ రాయుళ్లు

Posted: 07/11/2014 11:26 AM IST

(Image source from: telangana tdp mlas looking to jump in trs party)

ఏకంగా పదిసంవత్సరాలకు అధికారం నుంచి దూరం అయిన చంద్రబాబునాయుడు... తిరిగి అధికారం దక్కించుకోవడం ఎన్ని అవస్థలు పడ్డారో అందరికీ తెలిసిందే! పాదయాత్ర పేరుమీద దాదాపు 3000 వేల కిలోమీటర్ల వరకు చక్కర్లు కొట్టిన బాబు... నిద్రాహారాలు మానేసి జనం మధ్య తిరిగారు. ఇటు తెలంగాణ అంటు ఆంధ్రప్రదేశ్ లోనూ తన పార్టీయే అధికారంలోకి రావాలని ఎన్నో ప్రయత్నాలు చేశారు. అయితే ఆంధ్రప్రదేశ్ ప్రజలు ఈయనకు సీఎం పీఠం ఎక్కించినా... తెలంగాణ ప్రజలు మాత్రం ఈయనను, పార్టీని తిరస్కరించారు. ఒకవైపు సంతోషంగానే వున్నా... మరోవైపు దు:ఖంతో కొట్టుమిట్టాడుతున్నారు.

తెలంగాణాలో టీడీపీ పార్టీ అధికారంలోకి రాలేదని ఇక్కడున్న టీడీపీ ఎమ్మెల్యేలు కూడా తీవ్ర అసంతృప్తిని వ్యక్తం చేస్తున్నారు. గత పదేళ్ల నుంచి అధికారానికి దూరమయిన ఈ ఎమ్మెల్యేలకు ఈసారి కూడా తెలంగాణ ప్రజలు మొండిచెయ్యి చూపడంతో ఆవేదన వ్యక్తం చేస్తున్నారు. ఇక తమకు రాజకీయ భవిష్యత్తు తెలంగాణాలో వుండదని భావించిన వీరు... గులాబీ కండువా కప్పుకోవడానికి వ్యూహం చేస్తున్నట్లు చెబుతున్నారు.

తెలంగాణ రాష్ట్రంలో టీడీపీ పార్టీ తరఫున ఎమ్మెల్యేలుగా గెలిచిన కొంతమంది అభ్యర్థులు... టీఆర్ఎస్ పార్టీలోకి జంప్ అవ్వాలని మెంటల్ గా ఫిక్స్ అయినట్టు రాజకీయ విశ్లేషకులు పేర్కొంటున్నారు. అయితే పార్టీ మారితే ఎమ్మెల్యే పదవులకి అనర్హత వేటు పడుతుంది. దీంతోవారు ఈ వేటు నుంచి తప్పించుకోవడానికి అందరూ కలిసికట్టుగా పన్నాగం పన్నినట్టు వెల్లడిస్తున్నారు. సాధారణంగా ఐదుగురు ఎమ్మెల్యేలు లేదా అంతకంటే ఎక్కువమంది చీలిపోతే.. వారిపై అనర్హత వేటు పడదు. ఈ విధంగా తెలుగుతమ్ముళ్లు కూడా అందరూ కలిసి చీలిపోయేందుకు సిద్ధమవుతున్నారని స్పష్టం చేస్తున్నారు.

ఇందులో ముఖ్యంగా తలసాని శ్రీనివాస్ యాదవ్ (సికింద్రాబాద్), ప్రకాష్ గౌడ్ (రాజేందర్ నగర్), వివేకానందగౌడ్ (కుత్పుల్లాపూర్), రేవంత్ రెడ్డి (కొడంగల్), రాజేందర్ రెడ్డి(నారాయణ పేట) తదితర ఎమ్మెల్యేలు కారు ఎక్కాలని భావిస్తున్నట్లు చెబుతున్నారు. అయితే ఈ జాబితాపై ఇంకా అధికారికంగా సమాచారం రావాల్సి వుంది. ఇందుకు సంబంధించిన చర్చలు జరుగుతున్నట్టు రాజకీయవర్గాలు పేర్కొంటున్నాయి.

అయితే రేవంత్ రెడ్డి తాను గులాబీ కండువా కట్టుకోవడం లేదని ఖండిస్తున్నా... జంప్ అవడం ఖాయమనే వార్తలు కూడా బలంగానే వినిపిస్తున్నాయి. ఒకవేళ ఎమ్మెల్యేలు గనుక టీడీపీ నుంచి తెరాసలో చేరితే... తెలంగాణాలో టీడీపీ పార్టీకి భారీ దెబ్బ పడటం ఖాయమని అంటున్నారు. ఇందుకు సబంధించిన మొత్తం సమాచారం శ్రావణమాసంలో వెల్లడవుతుందని రాజకీయ విశ్లేషకులు చెబుతున్నారు.