తెలంగాణా సంబరం అందరిదీ!

Posted: 06/02/2014 11:35 AM IST

ఎన్టీఆర్ ట్రస్ట్ భవన్ లో తెలంగాణా ఆవిర్భావ వేడుకలను ఘనంగా నిర్వహించారు.  తెలంగాణా ఆవిర్భావం తెలంగాణా ప్రజలందరిదీ కాబట్టి తెలంగాణాలో ప్రతిపక్షంగా నిలిచిన తెలుగు దేశం పార్టీ ఎన్టీఆర్ ట్రస్ట్ భవన్ లోని అమరవీరుల స్తూపానికి నివాళులర్పించి ఆ తర్వాత జాతీయ పతాకాన్ని ఆవిష్కరించారు.  

తెలుగుదేశం పార్టీ తెలంగాణా శాఖ అధ్యక్షుడు ఎల్ రమణ, ఇంకా తెదేపా నాయకులు ఎర్రబల్లి దయాకర రావు, కొత్తకోట దయాకర రెడ్డి తదితరులు ఈ కార్యక్రమంలో పాల్గొన్నారు.  తెలంగాణా ప్రజలకు తెదేపా అధ్యక్షుడు చంద్రబాబు నాయుడు శుభాకాంక్షలు తెలియజేసారు.

అదే విధంగా కాంగ్రస్ పార్టీ నాయకులు గాంధీభవన్ లో తెలంగాణా ఆవిర్భవించిన సందర్భంగా వేడుకలు చేసుకున్నారు.  పిసిసి అధ్యక్షుడు పొన్నాల లక్ష్మయ్య జాతీయ జెండాను ఎగురవేసి, బంగారు తెలంగాణా కోసం కృషి చేస్తామని మాటిచ్చారు.  అడ్డంకులన్నిటినీ ఎదుర్కుంటూ సోనియా గాంధీ తెలంగాణాను తెచ్చారని ఆయన ఈ సందర్భంగా గుర్తు చేసారు.

భారతీయ జనతా పార్టీ కార్యాలయంలో కూడా తెలంగాణా ఆవిర్భావ వేడుకలు జరిగాయి.  జాతీయ జెండాను ఎగురవేసిన భాజపా తెలంగాణా అధ్యక్షుడు కిషన్ రెడ్డి, తెలంగాణా అభివృద్ధికి అందరూ పాటుపడాలని పిలుపునిచ్చారు.  

బంజారా హిల్స్ లోని లోక్ సత్తా పార్టీ కార్యాలయంలో తెలంగాణా ఆవిర్భావ దినోత్సవాన్ని ఆ పార్టీ జాతీయ అధ్యక్షుడు జయప్రకాశ్ నారాయణ జాతీయ జెండా, పార్టీ జెండాలను ఆవిష్కరించి జరిపించారు.  భౌగోళికంగా విడిపోయినా ఇరు ప్రాంతం వారు సామరస్యంతో మెలుగుతూ వర్థిల్లాలని ఆకాంక్షించారాయన.  తెలంగాణాలో ప్రభుత్వాన్ని ఏర్పాటు చేసిన తెలంగాణా రాష్ట్ర సమితి ఆ రాష్ట్రంలో ప్రజల ఆకాంక్షలకు అనుగుణంగా మసులుకుంటుందన్న ఆశాభావాన్ని కూడా ఆయన వ్యక్తంచేసారు.

-శ్రీజ