Posted: 07/18/2012 04:02 PM IST

ఒకప్పుడు బాలీవుడ్ ఇండస్ట్రీని ఏలిన సూపర్ స్టార్ రాజేష్ ఖన్నా ఈ రోజు బాంద్రాలోని తన స్వగృహం లో తుది శ్వాస విడిచారు. గత కొంత కాలంగా శ్వాసకు సంబంధించిన వ్యాధితో రాజేష్ ఖన్నా బాధ పడుతున్నారు. గత నెలలో తీవ్ర అనారోగ్యంలో ఆసుపత్రిలో చేరిన రాజేష్ ఖన్నాని నిన్ననే ఇంటికి పంపించారు. పరిస్థితి విషమించడంతో ఈయన తుది శ్వాస విడిచారు. ఈయన మరణ వార్త విన్న బాలీవుడ్ ఒక్కసారిగా శోక సముద్రంలో మునిగిపోయింది. ఈయన పార్టీవ దేహాన్ని చూడటానికి బాలీవుడ్ ప్రముఖులు, అభిమానులు భారీ ఎత్తున తరలి వస్తున్నారు.

1942 డిసెంబర్‌ 29లో అమృత్‌సర్‌లో జన్మించిన రాజేష్‌ఖన్నా బాలీవుడ్‌లో 163 సినిమాల్లో నటించారు. ఆయన మూడు ఫిల్మ్‌ఫేర్‌ అవార్డ్‌లను సొంతం చేసుకున్నారు. 1966లో "ఆఖ్రీ రాత్‌"సినిమాతో కెరీర్‌ను ప్రారంభించిన కాకా రాజ్‌, బహారోంకీ సప్నే, ఇత్తెఫాఖ్‌, ఆరాధన వంటి సూపర్‌హిట్‌ సినిమాల్లో నటించి ప్రేక్షకుల హృదయాల్లో సుస్థిర స్థానం సంపాదించారు. ఈయన నటుడుగానే కాకుండా నిర్మాతగా, రాజకీయ నాయకుడిగా కూడా రాణించారు. 1991 నుంచి 1996 వరకు ఎంపీగా పని చేశారు.

1973లో డింపుల్ కపాడియాను వివాహం చేసుకున్న ఖన్నా 1984లో ఆమె నుంచి విడిపోయాడు. ప్రస్తుతం వీరు విడివిడిగా జీవిస్తున్నప్పటికీ, విడాకులు తీసుకోలేదు. పెద్ద కూతురు ట్వింకిల్ ఖన్నా కొంత కాలం సినిమాల్లో నటించిన అనంతరం బాలీవుడ్ నటుడు అక్షయ్ కుమార్‍‌ను పెళ్లాడింది. రెండో కూతురు రింకీ ఖన్నా కూడా ఒకటిరెండు సినిమాల్లో నటించింది. తర్వాత ఆమె లండన్‌లోని ఓ వ్యాపారవేత్తను వివాహం చేసుకొని అక్కడే స్థిరపడింది. ఖన్నాతో విడిపోయినప్పటికీ డింపుల్ కపాడియా కొంత కాలంగా ఆయన వెంటేవుండి సపర్యలు చేస్తున్నారు. ఒకప్పుడు బాలీవుడ్ అంటే రాజేష్‌ ఖన్నా. రాజేష్‌ఖన్నా అంటే బాలీవుడ్‌. ఆయన లేని బాలీవుడ్‌ను ఊహించుకోలేం.
ఈయన మరణం పట్ల బాలీవుడ్ సినీ ఇండస్ట్రీతో పాటు ఆంధ్రవిశేష్ కూడా తన ప్రగాఢ సానుభూతిని తెలియజేస్తుంది.