Posted: 12/21/2011 09:38 AM IST

అవినీతి పై అన్నా హజారే చేస్తున్న ఉద్యమానికి కొంత ప్రతిఫలం లభించింది. పార్లమెంట్ లో ‘లోక్ పాల్’ బిల్లు ప్రవేశపెట్టాలని అన్నా హజారే చేస్తున్న డిమాండ్ ను సూత్ర ప్రాయంగా అంగీకరిస్తూ కేంద్రం తనకు అనుకూలంగా తయారు చేయించుకున్న బిల్లును రేపు లోక్ సభలో ప్రవేశపెట్టనుంది. ఈ లుకలుకల లోక్‌పాల్‌పై ప్రభుత్వం ఎట్టకేలకు ఓ నిర్ణయానికి రాగలిగింది. ప్రభుత్వ ప్రతిపాదనల ప్రకారం.. లోక్‌పాల్‌లో తొమ్మిదిమంది సభ్యులుంటారు. చైర్మన్‌ను నలుగురు సభ్యుల కమిటీ ఎన్నుకుంటుంది. ఈ కమిటీలో ప్రధాని, లోక్‌సభ స్పీకర్, లోక్‌సభలో ప్రతిపక్ష నేత, సుప్రీంకోర్టు ప్రధాన న్యాయమూర్తి లేదా.. సుప్రీంకోర్టు జడ్జీల నుంచి ఆయన నామినేట్ చేసిన వ్యక్తి ఉంటారు. ప్రధానమంత్రిని కూడా లోక్‌పాల్ పరిధిలోకి తెస్తున్న ఈ బిల్లు.. ఆయనకు పలు రంగాల్లో రక్షణలు కల్పించింది.  లోక్‌పాల్ వ్యవస్థకు రాజ్యాంగ బద్ధ హోదాను కూడా కల్పించింది.

సీబీఐని లోక్‌పాల్ పరిధిలోకి తేవాల్సిందేనని అన్నా హజారే బృందం గట్టిగా పట్టుబట్టినా, ప్రభుత్వం మాత్రం అందుకు తలొగ్గలేదు. ప్రభుత్వ ప్రతిపాదనలపై అన్నా బృందం భగ్గుమంది. ఈనెల 27 నుంచి మూడు రోజుల పాటు నిరాహార దీక్ష, 30వ తేదీ నుంచి జైల్‌భరో ఉద్యమాలు చేపట్టనున్నట్లు అన్నా హజారే ప్రకటించారు. తర్వాత 30 నుంచి జైల్‌భరో ఉద్యమం మొదలుపెడతానని తన స్వగ్రామం రాలెగావ్‌సిద్ధిలో ప్రకటించారు.

బిల్లును ప్రవేశపెట్టేందుకు వీలుగా పార్లమెంటు సమావేశాలను ఈనెల 27 నుంచి 29 వరకు పొడిగించాలని తొలుత తలపెట్టినా, తర్వాత ఎంపీలు క్రిస్మస్ సెలవుల తర్వాత పార్లమెంటుకు రావడానికి విముఖత చూపించడంతో 22నే బిల్లు ప్రవేశపెట్టాలని సర్కారు నిర్ణయించినట్లు తెలుస్తోంది.