రాజకీయాలు వేరు.. సినిమాలు వేరు.. తెలుసుకోండి..

Posted: 11/29/2014 04:34 PM IST

రాజకీయాలు వేరు, సినిమాలు వేరని, రాజకీయాలంటే బ్లాక్ బస్టర్ సినిమాలు కాదని, రెండింటికీ అసలు సంబంధమే లేదని సూపర్ స్టార్ రజనీకాంత్కు ప్రముఖ నటి, కాంగ్రెస్ పార్టీ నేత కుష్బూ చురకలంటించారు. ప్రజలకు సేవ చేయాలని ఉంటే రాజకీయాల్లోకి రావాలని రజనీకి ఆమె హితబోధ చేశారు. రాజకీయాల్లోకి రావాడానికి తనకు భయం లేదని చెబుతూనే రజనీకాంత్ వెనుకంజ వేస్తున్నారని ఆమె విమర్శించారు. అంతేకాని కాసేపు వస్తాను, మరి కాసేపు రానంటూ కుప్పిగంతులు వేయొద్దని  కుష్బూ సూచించారు. రాజకీయాలంటే.. ప్రజాసేవని, సినిమా కలెక్షన్లు కాదని ఆమె అన్నారు.

కుష్బూ మీడియాతో మాట్లాడుతూ తమిళనాడులో కాంగ్రెస్ పార్టీని క్షేత్రస్థాయి నుంచి బాగు చేయాలని అన్నారు. ఆ బాధ్యతను కాంగ్రెస్ అధిష్టానం తనకు అప్పగించిందన్నారు. ఆమె రెండు రోజుల క్రితం డీఎంకే పార్టీకి రాజీనామా చేసి.... సోనియాగాంధీ సమక్షంలో కాంగ్రెస్ పార్టీ తీర్థం పుచ్చుకున్నారు. కుష్బూ బీజేపీలో చేరతారని గత కొంత కాలంగా మీడియాలో కథనాలు వెల్లువెత్తతున్నాయి. అయితే ఆమె హస్తం పార్టీలో చేరి ఆ కథనాలకు పుల్ స్టాప్ పెట్టారు.

జి మనోహర్