ప్రజల కోసం రాహుల్ సర్కస్ ఫీట్లు

Posted: 11/28/2014 07:33 AM IST

కాంగ్రెస్ ఉపాధ్యక్షుడు రాహుల్ గాంధీ ప్రజల కోసం తన ప్రాణాలైనా ఇస్తానని మరోసారి స్పష్టం చేశారు. ఢిల్లీలోని రంగ్ పురి పహాడి స్లమ్ ఏరియాలోని పేదల ఇండ్ల కూల్చివేతపై రాహుల్ తీవ్రంగా స్పందించారు. ఇళ్ళ కూల్చివేత వల్ల నిరాశ్రయులుగా మారిన ప్రజలను గురువారం రాత్రి ఆయన పరామర్శించారు. బాధితుల పక్షాన పోరాడుతామని హామి ఇచ్చారు. ఈ సందర్బంగా అధికారుల తీరుపై ఆగ్రహం వ్యక్తం చేశారు. మరోసారి బుల్డోజర్లు ఉపయోగించాల్సి వస్తే.., వాటిని ముందుగా తన శరీరంపైనుంచి పోనివ్వాల్సి ఉంటుంది అని హెచ్చరించారు.

చలికాలంలో, బయట ఉష్ణోగ్రతలు విపరీతంగా పడిపోతుంటే.., పేదల ఇండ్ల కూల్చివేస్తే వారు ఎక్కడకు వెళ్ళి బ్రతుకుతారని అధికారులను ప్రశ్నించారు. వారికి న్యాయం జరిగే వరకు కాంగ్రెస్ పార్టీ పోరాడుతుందని స్పష్టం చేశారు. కనీసం నోటిసులు ఇవ్వకుండా ఇండ్లను కూల్చివేయటం దారుణం అని మండిపడ్డారు. అయితే కూల్చివేతలు నిబంధనల ప్రకారమే జరిగాయని ఢిల్లీ రెవిన్యూ, ఫారెస్ట్ అధికార వర్గాలు వెల్లడించాయి.

 

కార్తిక్