‘బాహుబలి’ షూటింగ్ లో ప్రమాదం

Posted: 10/13/2014 08:04 AM IST

హీరో ప్రభాస్ తాజా సినిమా బాహుబలి షూటింగ్ సమయంలో ప్రమాదం జరిగింది. ఈ విషయం ఆలస్యంగా బయటకు వచ్చింది. ప్రస్తుతం రామోజి ఫిలిం సిటిలో సినిమా షూటింగ్ జరుగుతోంది. ఇక్కడ పలు ఫైట్ సీన్లను షూట్ చేస్తున్నారు. శనివారం రోజు ఫైట్ సీన్ లో భాగంగా.., భారీగా కుంకుమను చల్లేందుకు పేలుడు పధార్ధాలు ఉపయోగించారు. ఈ సమయంలో ప్రమాదవశాత్తు అవి పేలి మంటలు వ్యాపించాయి. దీంతో ఫైట్ సీన్ లో నటించాల్సిన నలుగురు ఫైటర్లు సతీష్, పాండు, గణేష్, సంతోష్ కు స్వల్ప గాయాలు అయ్యాయి.

వెంటనే అప్రమత్తమైన షూటింగ్ సిబ్బంది.., గాయపడ్డవారిని సమీపంలోని ఆస్పత్రికి తరలించారు. హయత్ నగర్ లోని ఓ ఆస్పత్రిలో ప్రధమ చికిత్స చేయించుకుని వారు వెంటనే వెళ్లిపోయినట్లు తెలుస్తోంది. ఈ ప్రమాదం శనివారం జరిగినా.., సినిమా యూనిట్ వర్గాలు బయటకు పొక్కనీయలేదు. అయితే విశ్వసనీయ వర్గాల సమాచారం ప్రకారం ఇది తెలుస్తోంది. ప్రభాస్ హీరోగా వస్తున్న ఈ సినిమాను రాజమౌళి డైరెక్ట్ చేస్తున్న విషయం తెలిసిందే. వచ్చే ఏడాదిలో దీన్ని విడుదల చేసేందుకు సన్నాహాలు చేస్తున్నారు.

 

కార్తిక్